राम राम मिपाकरहो, अलिकडेच मिसळपाव डॉट कॉम (मिपा) च्या मालकांना, मिपाच्या संपादक मंडळाला जाब विचारणारे काही धागे पाहंण्यात आले. ते आम्ही अर्थातच रद्द केले आहेत. त्याच अनुषंगाने आम्ही हे निवेदन पुन्हा एकवार देत आहोत. निवेदन - (कृपया सर्वांनी नोंद घ्यावी) १) मिपा या संकेतस्थळावर लिहिला जाणारा कुठलाही मजकूर अप्रकाशित करण्याचे/रद्द करण्याचे पूर्णाधिकार मिपाचे मालक, मिपाचे संपादक मंडळ यांचेकडे आहेत. तसेच याकरता मिपा मालक/मिपा संपादक मंडळ कुणाही सभासदाला कुठलेही स्पष्टीकरण देणे लागत नाही. २) मिपाच्या कुठल्याही सभासदाचे सभासदनाम (आयडी) ब्लॉक करण्याचे, प्रसंगी संपूर्ण सभासदत्वच रद्द करण्याचे पूर्णाधिकार मिपाचे मालक यांचेकडे आहेत. त्या करता मिपाचे मालक कुणालाही कुठलेही स्पष्टीकरण देणे लागत नाहीत. ३) मिपावर लिहिल्या जाणार्‍या कुठल्याही लेखनाची जबाबदारी मिपा, मिपा व्यवस्थापन, मिपा मालक, मिपा संपादक मंडळ स्विकारत नाही. सभासदांनी येथे पूर्णत: आपापल्या जबाबदारीवरच लेखन करावे. ४) मिपावर लिहिल्या जाणार्‍या कुठल्याही मजकुराचे मिपा कोणतेही हक्क राखून ठेवत नाही. त्यामुळे मिपावर प्रसिद्ध झालेला मजकूर लेखकाव्यतिरिक्त अन्य कुणा व्यक्तिने अन्यत्र कुठल्याही ठिकाणी प्रकशित केला/संदर्भ म्हणून सादर केला किंवा त्याचा अन्य काही गैरवापर केला तर त्याची जबाबदारी मिपा, मिपा व्यवस्थापन, मिपा मालक, मिपा संपादक मंडळ स्विकारत नाही. ५) खरडवह्या आणि व्यक्तिगत निरोप ही सोय सभासदांमध्ये आपापसात संवाद साधण्यासाठी मिपाने ठेवली आहे. परंतु त्याचा गैरफायदा घेऊन जर एखाद्या सभासदाने अन्य कुणाही सभासदाला काही आक्षेपार्ह मजकूर लिहिल्यास ते अत्यंत गैर ठरवले जाईल व असा मजकूर लिहिणार्‍या सभासदाचे सभासदत्व रद्द केले जाईल. अश्या प्रकारांबद्दल तक्रारकर्त्या सभासदाने तातडीने मिपाचे मालक, संपादक मंडळ यांच्याकडे तक्रार करावी. मिपा व्यवस्थापनातर्फे या तक्रारीची कायदेशीर नव्हे परंतु नैतिक जबाबदारी घेतली जाईल व संबंधित सभासदावर लवकरात लवकर कारवाई करण्यात येईल. मिपाचा वाढता पसारा लक्षात घेऊन मिपाच्याच एक सन्मानयीय सदस्या ३_१४ विक्षिप्त अदिती, ज्या सध्या 'मिपा खरडफळा संपादक' या पदावर कार्यरत आहेत, त्यांना बढती दिली गेली असून त्या आता 'मिपा संपादक' या पदाचेही काम पाहतील. मिपाच्या अन्य सन्माननीय संपादकांसारखेच त्याही अत्यंत चोखपणे आपली कामगिरी बजावतील असा मिपा व्यवस्थापनाचा विश्वास आहे. कळावे, तात्या अभ्यंकर, मालक, मुख्य व्यवस्थापकीय अधिकारी, मिसळपाव डॉट कॉम.