अभिषेक, आमीर खान आणि ऐश्‍वर्या मराठी चित्रपटामध्ये !

आज सकाळी सकाळी 'सकाळ ' मधिल एका बातमी णे लक्ष वेधले ! अभिषेक बच्चन, ऐश्‍वर्या राय आणि आमीर खान एका मराठी चित्रपटामध्ये काम करणार आहेत. या चित्रपटाचे नाव अद्याप ठरलेले नसले तरी साधारण दिवाळीच्या आसपास हा चित्रपट सेटवर जाणार आहे. त्याची निर्मिती ए. पी. कॉर्प या बॅनरखाली केली जाणार आहे. खरे तर बच्चन कुटुंबीय आणि त्यांचे मराठी प्रेम तसे काही नवीन राहिलेले नाही. अमिताभ बच्चन-जया बच्चन यांनी "अक्का' या चित्रपटामध्ये पाहुणे कलाकार म्हणून काम केले होते. त्यानंतर ए. बी. कॉर्प या बॅनरखाली अमिताभ बच्चन यांनी "विहीर' या चित्रपटाची निर्मिती केली होती. हा चित्रपट अनेक जागतिक महोत्सवामध्ये गाजला होता आणि आजही तो राष्ट्रीय; तसेच आंतरराष्ट्रीय पातळीवरील चित्रपट महोत्सवामध्ये जात आहे. मध्यंतरी मराठी नाटक आणि चित्रपटांच्या दुबईत झालेल्या "मिफ्टा' या ऍवॉर्ड सोहळ्याला अमिताभ बच्चन यांनी हजेरी लावली होती आणि मराठीबद्दल कौतुकोद्‌गार काढले होते. डोंबिवलीतील नाट्यसंमेलन; तसेच पुण्यात गेल्या वर्षी झालेल्या साहित्य संमेलनामध्येही अमिताभ बच्चन उपस्थित राहिले होते आणि त्यांनी मराठी अभिमान गीताविषयी मराठीमध्ये बोलून सर्वांना आश्‍चर्याचा धक्का दिला होता. त्यामुळे आपल्या मराठीच्या प्रेमाखातर त्यांनी दुसरा मराठी चित्रपट काढण्याचे ठरविले आहे. या चित्रपटात अभिषेक-ऐश्‍वर्या काम करणार आहेतच; शिवाय त्यांनी आमीरलाही या चित्रपटामध्ये एका खास भूमिकेसाठी घेण्याचे निश्‍चित केले आहे. मुळात आमीर लहानाचा मोठा मुंबईत झाला आहे. त्यामुळे मराठी संस्कृती आणि भाषेचे त्याला ज्ञान आहे. नागपूर येथील एका कार्यक्रमात त्याने मराठी चित्रपटाची निर्मिती करायला आपणास आवडेल असेही सांगितले होते. सुहास लिमयेकडून त्याने मराठीचे धडेही गिरविले आहेत. त्यामुळे तो देखील या चित्रपटात काम करण्याबाबत अत्यंत "एक्‍साईट' असल्याचे सांगण्यात येते. चित्रपटातील अन्य कलाकार ठरलेले नसले तरी या सिनेमाच्या निर्मितीमूल्यांबाबत तडजोड केली जाणार नसून त्याचे चित्रीकरण लंडन, मॉरिशस, न्यूझीलंड, स्वीत्झर्लंड येथे होईल असे सांगण्यात आले. मात्र अमिताभ यांच्या निर्मिती संस्थेचे नाव ए. बी. कॉर्प असताना या सिनेमाची निर्मिती ए.पी. कॉर्प या वेगळ्या नावाने का केली जाते आहे असे विचारले असता ए. पी. हा "एप्रिल फुल'चा शॉर्टफॉर्म असल्याचे सांगण्यात आले :D