(गड गड गड) पाऊस थांबायचे नाव घेईना खिडकीचे तावदाने थरारत थडथडतायत तावदानावर एक एक नीरओळ लिहून जातोय पाऊस गूढ, अनाकलनीय भाषेत (गड गड गड) ----- धडकी भरवणारा ढगांचा गडगडाट कौलांवरची टीपटीप थेंबांची लय चिंचेच्या पानांवरून सरकणारे ओघळ आणि खालच्या पत्र्याच्या डब्यावर होणारे त्यांचे आघात (गड गड गड) ------ खिडकीतून हे सगळे बिचकत बघणारा मी हातात तुझी आणि माझी लग्नातली तस्बीर त्यात हसणारी तू आणि तुला हसतांना बघून हसणारा मी (गड गड गड) ------ रस्त्यांवरच्या पिवळ्या दिव्यांमध्ये चमचमणारे ते चिंचेचे ओघळ डोळ्यांखाली निसटणारे ओले अश्रु स्स... चटका लावणारे तो चंदेरी-पिवळा रंग मनात घर करून जाणारा (गड गड गड) ------ पावसाचे तांडव वाढतच जातंय पावसाने तावदानावर सर सर सर लिहिलेली आत्ताचीच नीरओळ चक्क माझ्या मनाच्या, पण तरीही गूढ भाषेत . . आज तू हवी होतीस... स्स . . गड गड गड गड गड गड |-मिसळलेला काव्यप्रेमी -| (१२/०८/२०१३)