जिंदगी या बायकांची,राळ आहे का?

— सत्यजित... , गुरुवार, 05/11/2017 - 00:10

वृत्तपत्रातून इतका जाळ आहे..का? बातम्यांचा एवढा दुष्काळ आहे का? शेत आहे काळजाचा एक तुकडा पण कर्ज म्हणजे नांगराचा फाळ आहे का? वास्तवाच्या विस्तवाशी खेळतो आहे तो कुणी त्या अंजनीचा बाळ आहे का? फुंकली जाते तरी गंधाळते रे ती... जिंदगी या बायकांची,राळ आहे का? आजही तो त्या विटेवर थांबला आहे त्या विटेखाली जगाचा गाळ आहे का? —सत्यजित

💬 प्रतिसाद (10)

गझलेबद्दल काही...

सत्यजित...

गुरुवार, 05/11/2017 - 00:14 नवीन

गझलेबद्दल जाणून घेण्याची इच्छा असणारांसाठी... गझलेचा प्रत्येक शेर,हा एक स्वतंत्र कविताच असतो! कोणताही शेर वेगळा करुन वाचला तरीही त्यातून पूर्ण अर्थ लागतो! सर्व शेरांत साधारणतः एकच विषय हाताळला जातो,ती 'मुसलसल' गझल,तर प्रत्येक शेरांत वेगळ्या विषयावर भाष्य केले असेल,ती 'गैरमुसलसल' गझल! त्यामुळे गझल वाचत/ऐकत असताना (विशेषतः गैरमुसलसल),रसिकाने पहिल्या शेरांतून स्वतःच्या मनाची सोडवणूक करुन पुढील शेराच्या विचारात नव्याने गुंतणे अपेक्षित असते!

जिच्या सर्व शेरांत एकच विषय

शिवोऽहम्

गुरुवार, 05/11/2017 - 04:27 नवीन

जिच्या सर्व शेरांत एकच विषय हाताळलेला असतो अशा गझलला 'नज्म' म्हणतात ना? की नज्म म्हणजेच मुसलसल गझल, किंवा इतर प्रकार?

↩ प्रतिसाद: सत्यजित...

गोंधळ काहीसा दूर झाला हे

शिवोऽहम्

गुरुवार, 05/11/2017 - 04:34 नवीन

गोंधळ काहीसा दूर झाला हे वाचून (https://www.quora.com/Poetry-What-is-the-difference-among-Ghazal-Nazm-Sher-Doha-Rekhti-Marsiya-and-Rubai). फैझ़च्या अनेक प्रसिद्ध कविता या नज्म़ आहेत हे रेख्तावर पाहिले (https://rekhta.org/poets/faiz-ahmad-faiz/nazms)

↩ प्रतिसाद: शिवोऽहम्