या आधीचे लेखः साकिया - पुर्वतयारी साकिया (१) .. साकिया (२) - "मॅडम आय ऍम युअर ऍडम" साकिया (३) - "टकिला सनराईज" साकिया (४) - "स्ट्रॉबेरी डायक्युरी" सकिया (५) - "चॉकलेट बनाना" (लहान मुलांसाठी खास) सकिया (६) - स्पायसी मार्गारिटा =============================================================== मंडळी सर्वप्रथम या वेळेस बरेच दिवस कॉकटेल मिपावर टंकू शकलो नाही त्याबद्दल क्षमस्व. आता गटारी निमित्य परा आणि सहजरावांनी केलेली आदेश वजा विनंती मानून हा लेख लिहीत आहे. गटारीसाठी नुसतेच कॉकटेल टाकणे मला काही पटेना. बराच वेळ विचार केला नंतर ठरवले की बरोबर चमचमीत सामीष भोजन असल्या शिवाय काही मजा नाही. म्हणून या वेळेस कॉकटेल सोबत एक सरप्राईज "गोंगुरा चिकन". हा चिकनचा प्रकार आंध्रप्रदेशात फार लोकप्रिय आहे. गोंगुरा म्हणजेच आपल्या कडची अंबाडीची भाजी (Sorrel Leaves). हा प्रकार आंबट-तिखट असल्यामुळे मदिरेसोबत खायला फारच छान लागतो. तर पटापट साहित्य आणि कृती बघुया. हो 'तिर्थ-प्रसादाला' फार उशीर नको. साहित्य: चिकन साठी: १ किलो चिकन (बोनलेस असल्यास उत्तम) ३-४ मध्यम आकाराचे कांदे बारीक चिरून ८-१० कढीपत्त्याची पाने ३ चमचे आले-लसूण पेस्ट १ चमचा हळद १-२ चमचे लाल तिखट १ कप दही ५-६ हिरव्या मिरच्या (तिखट जास्त हव्या असल्यास जास्त वापरा) २ वाट्या भरून अंबाडीची पाने १ वाटी कोथींबिर ३-४ पुदिन्याची पाने चवीनुसार मीठ गरम मसाल्या साठी: ४ लवंगा १ दालचिनीची कांडी ३-४ मसाल्याच्या वेलची ३ चमचे धणे ४-५ काळी मिरी कृती: चिकनचे मध्यम आकाराचे तुकडे करून धुवून चांगले कोरडे करून घ्या. त्याला दही, हळद, १/२ चमचा मीठ, आले-लसूणाची पेस्ट आणि लाल तिखट लावुन १ तास मुरत ठेवा. एका तव्यावर गरम मसाल्याचे लागणारे सगळे पदार्थ भाजून त्याची मिक्सरमध्ये पावडर करून घ्या (तयार गरम मसाला वापरला तरी चालेल पण ताज्या मसाल्याने जी चव येते तशी येणार नाही). दुसर्‍या एका भांड्यात १/४ कप पाणी घ्या आणि ते तापवा. पाणी उकळू लागले की त्यात अंबाडीची पाने, कोथींबिर, मिरच्या आणि पुदिन्याची पाने टाका. २-३ मिनटात एक चांगली उकळी फुटली कि हे सर्व मिश्रण बाजुला ठेवुन थंड होऊ द्या. मिश्रण चांगले थंड झाले की ते मिक्सर मधून चांगले ग्राइंड करून घ्या. आता एका जाड बुडाच्या भांड्यात तेल टाका आणि ते चांगले तापले की कांदा आणि कढीपत्ता टाकून परता. कांद्याला तेल सुटू लागले की त्यात मुरत ठेवलेले चिकन टाका. चिकन चांगले परतून घ्या. नंतर त्यात १ वाटीभर पाणी टाकून मंद आचेवर १०-१५ मिनीटे झाकण ठेवून शिजवा. नंतर त्यात अंबाडीची केलेली पेस्ट टाका आणि आणखी १० मिनीटे मध्यम आचेवर शिजू द्या. झाले चिकन तयार. चिकन बरोबर पोळी/रोटी/नान/पराठा काहीही चालते पण मी मात्र अगदी दाक्षिणात्य पध्दतीप्रमाणे गरमागरम कुरकुरीत डोसे करून घेतले. सौं. ने आधीच डोश्याचे पिठ आंबवून ठेवले होतेच म्हटले होऊन जावू दे. पटापट तव्यावरून डोसे काढले, कांदा/टोमॅटो चिरून घेतले आणि पान मांडले. खायला बसण्या आधी प्रसादाबरोबर तिर्थ हवे(च) म्हणून तिर्थाची तयारी केली. साहित्य: - १ औंस कॉईनट्र्यू (Cointreau) - १ औंस संत्र्याचा रस - २ औंस व्होडका - १ औंस डाळींबाचा रस - ८-१० डाळींबाचे दाणे - सजावटी साठी संत्र्याचे/डाळींबाचे साल, संत्र्याची फोड इ. इ. इ. - बर्फ कृती: शेकर मध्ये बर्फाचे तुकडे, संत्र्याचा रस, व्होडका, कॉईनट्र्यू टाका आणि चांगले शेक करा. एका कॉकटेल ग्लासमध्ये डाळींबाचे दाणे टाका आणि त्यावर शेकर मधले द्रावण ओता. त्यावर एक चमचा वापरून अलगद डाळींबाचा रस सोडा. त्यावर संत्र्याची फोड, साल इ. लाउन सुशोभीत करा. कॉकटेल तयार आहे. काही फोटो: हे सगळे यथेच्छ आडवा होईस्तोवर हाणले. त्यानंतर मुखशुध्दी म्हणून पानाचा तोबरा भरला आणि अर्धा तास तुर्यावस्थेत गेलो. त्यातुन जरा भानावर आल्यावर मिपावर आलो आणि स्वत:चे गुण स्वत: गायला बसलो. डिस्क्लेमरः १. सूरापानासाठी किमान २१ (की १८?) वर्षे वय असणे गरजेचे आहे अथवा हे कायदे प्रत्येक देश/राज्यावर अवलंबून आहेत. २. अल्कोहोलचे सेवन आपापल्या जबाबदारीवर करावे. धन्यवाद... - नाटक्या