Skip to main content

असं वाटतं !

लेखक श्वेता२४ यांनी बुधवार, 25/04/2018 11:19 या दिवशी प्रकाशित केले.

असं वाटतं सारं काही मनासारखं व्हावं...............
निळंभोर आभाळ सगळं कवेमध्ये घ्यावं......................

गडबडीची सकाळ अन ठरलेलं रुटीन
सोबत भाजी-पोळीने भरलेला टीफीन
साडेआठची लोकल कधीच चुकवून चालत नाही
इकडे तिकडे पाहायला मुळी वेळच मिळत नाही
कशाला मग पहाटेची किलबिल ऐकू येईल?
फुलणाऱ्या फुलांसोबत मनही फुलुन येईल?
म्हणून वाटतं पहाट बनून आपणच उजळून यावं...................
असं वाटतं सारं काही मनासारखं व्हावं ............................

तीचतीच तोंडे तेचतेच काम मशीन बनवून टाकते
ऑफीसच्या चार भिंतीत जग बंदीस्त होऊन जाते
मग वाटतं घडयाळाचा काटाच उपटून घ्यावा
बॉसचा हळूच डोळा चूकवून चक्क पळ काढावा
मग मला खुल्या हवेत श्वास घेता येईल?
रानामधलं गवत बनून मंद डोलता येईल?
वाटतं झऱ्याचं पाणी बनून खळखळ वाहत जावं.....................
असं वाटतं सारं काही मनासारखं व्हावं ........................

कधीतरी वाटतं जरा वेड्यासारखं वागू
गरमगरम शिऱ्यामध्ये सॉस घालून खाऊ
किंवा सगळेच सरळ चालतात आपण उलटे चालू
निरर्थक..., अकारण...., उगीच भटकत राहू
मनसोक्त भटकून मात्र थेट घरी येईन
आईच्या मांडीवर गाढ झोपून जाईन
तेवढ्या काळापुरतं माझं बालपण मला मिळावं...................
असं वाटतं सारं काही मनासारखं व्हावं ............................

- श्वेता

काव्यरस
कविता माझी
लेखनविषय:
वाचने 6271
प्रतिक्रिया 16

प्रतिक्रिया

खिलजि बुधवार, 25/04/2018 18:27

बालपण देगा देवा

मुंगी साखरचा रवा

आपण पुढे व्हा

आम्ही येतोय मागून

हे बघा आलोच

सिद्धेश्वर विलास पाटणकर

गड्डा झब्बू शुक्रवार, 26/07/2019 18:13

कधीतरी वाटतं जरा वेड्यासारखं वागू
गरमगरम शिऱ्यामध्ये सॉस घालून खाऊ

:-)) :-)) :-)) आमच्या हापिसातली एक महिला सहकारी नुसत्या भातात सफरचंद आणि अननसाच्या फोडी घालून खाते ते आठवलं एकदम :-))
छान लिहिलंय!

जॉनविक्क शनिवार, 27/07/2019 23:31

भातात सफरचंद आणि अननसाच्या फोडी वगैरे काश्मिरी पुलावात पण घालतात :).