गुजरात आणि हिमाचल प्रदेश विधानसभा निवडणुक-२०१७ मतमोजणी

मतमोजणी ८ वाजता सुरू होईल. सुरवातीला पोस्टल मतांची मोजणी होईल. ती पूर्ण झाल्यानंतर ई.व्ही.एम उघडण्यात येतील. साधारण ८ वाजून १० मिनिटांच्या सुमारास पहिले कल हाती येतील. जसेजसे कल (आणि नंतर निकाल) हातात येतील तसेतसे मी ते इथे पोस्ट करणार आहेच.

गुजरातचे मुख्यमंत्री विजय रूपाणी यांना भाजप जिंकल्यास मुख्यमंत्री होणार का हा प्रश्न विचारल्यावर त्यांनी 'पक्ष जो निर्णय घेईल तो मान्य असेल' असे म्हटले. त्यामुळे पक्षाचा रूपाणी सोडून अन्य कोणाला मुख्यमंत्री करायचा बेत आहे का असा प्रश्न निर्माण झाला आहे. उपमुख्यमंत्री नितीन पटेल यांना निवडणुक झाल्यानंतर मुख्यमंत्री केले जाणार का? ते मेहसाणामधून निवडणुक लढवत आहेत. त्यांच्या मतदारसंघात मोठ्या प्रमाणावर पटेल मतदार आहेत त्यामुळे त्यांची जागा धोक्यात आहे असे म्हटले जात आहे. मुळात विजय रूपाणी किंवा अन्य कोणा भाजप नेत्याला मुख्यमंत्री करायचा प्रश्न उभा राहणार की नाही हे समजेल अजून काही तासात. उत्सुकता शिगेला पोहोचली आहे.

मतमोजणी सुरू झाली आहे. पहिले कल काही मिनिटात हाती येतील.

गुजरातमधील पहिले कल हाती आले आहेत. पहिला कल भाजपच्या बाजूने गेला आहे. नक्की जागा कोणती हे अजून सांगितलेले नाही.

गुजरातमधून आणखी काही कल आले आहेत. भाजप ४ जागांवर तर काँग्रेस एका जागेवर आघाडीवर आहे.

आता गुजरातमध्ये भाजप १० जागांवर तर काँग्रेस २ जागांवर पुढे आहे. काँग्रेस गांधीनगर उत्तर आणि पाटणमधून तर भाजप अंजार, दहेगाम, दीसा या जागांवरून पुढे आहे.

हे आकडे पोस्टल मतांचे आहेत. त्यामुळे हे आकडे वेगवेगळ्या चॅनेलवर थोडे वेगळे आहेत. हे आकडे थोडेफार बदलू शकतात. नितीन पटेल मेहसाणामधून पुढे आहेत. घाटलोडिया या भाजपच्या बालेकिल्ल्यातून भाजप पुढे आहे.

मुख्यमंत्री विजय रूपाणी राजकोट पश्चिम मधून आणि उपमुख्यमंत्री नितीन पटेल मेहसाणामधून पुढे आहेत.

एन.डी.टी.व्ही वर भाजप २० आणि काँग्रेस ४ वर पुढे असे दाखवत आहेत तर रिपब्लिकवर ९-९ असे आकडे दाखवत आहेत.

एन.डी.टी.व्ही वर दावा केला जात आहे की त्यांनी निवडणुक आयोगाने व्हेरीफाय केलेले आकडे दाखवत आहेत. एन.डी.टी.व्ही वर भाजप ४४ तर काँग्रेस ११ जागांवर पुढे दाखवत आहेत. तर इतर लोकल चॅनेल्सवर भाजप ५२ ठिकाणी आणि काँग्रेस ४१ ठिकाणी आघाडीवर आहे असे दाखवत आहेत.

आता एन.डी.टी.व्ही आणि इतरांमधला फरक थोडा कमी झाला आहे. एन.डी.टी.व्ही अर भाजप ५७ आणि काँग्रेस १९ जागांवर पुढे दाखवत आहेत तर लोकल चॅनेलवर भाजप ६३ आणि काँग्रेस ४१ जागांवर पुढे दाखवत आहेत. एन.डी.टी.व्ही वर हिमाचलमध्ये भाजप ३ आणि काँग्रेस १ जागेवर दाखवत आहेत तर इतर लोकल चॅनेलवर भाजप २७ आणि काँग्रेस ८ जागांवर पुढे दाखवत आहेत.

आताच एन.डी.टी.व्ही वर जाहिर केले की आतापर्यंत आकडे आले आहेत त्यापैकी ९०% मते पोस्टल मते आहेत. त्यामुळे हे आकडे बदलू शकतात. सध्याचे आकडे--- भाजप ६०, काँग्रेस २४ आणि इतर १ (गुजरातमध्ये) तर हिमाचलमध्ये भाजप ३ आणि काँग्रेस १.

काँग्रेसचे शक्तीसिंग गोहिल मांडवीमधून आघाडीवर आहेत, वडगाममधून जिग्नेश मेवानी आघाडीवर आहेत. राधनपूरमधून अल्पेश ठाकोर पिछाडीवर आहेत.

मेहसाणामधून काँग्रेस आघाडीवर दाखवत आहेत. याचा अर्थ उपमुख्यमंत्री नितीन पटेल पिछाडीवर गेलेले दिसत आहेत.

एन.डी.टी.व्ही वरील नकाशावरून काँग्रेसने सौराष्ट्रमध्ये बर्‍यापैकी आघाडी मिळवलेली दिसत आहे. आताचे आकडे गुजरातः भाजप: ६९ , काँग्रेसः ३४ हिमाचलः भाजपः ८, काँग्रेसः २

आता काँग्रेसने फरक बराच कमी केलेला दिसत आहे. आता भाजप ७२ तर कॉम्ग्रेस ४३ जागांवर पुढे आहे. भाजपने मागच्या वेळेपेक्षा ४ जागांवर मागे आहे तर काँग्रेसने ६ जास्त जागा मिळवताना दिसत आहे. हिमाचलमध्ये भाजप १२ तर काँग्रेस ४ जागांवर पुढे आहे.

आतापर्यंतचे आकडे बघता गुजरातमध्ये भाजप जिंकेल पण २०१२ पेक्षा काहीशा कमी जागा घेऊन असे वाटते. हिमाचलमध्ये मात्र भाजपचा विजय होताना दिसत आहे. याक्षणी: गुजरातमध्ये भाजप-- ७९, काँग्रेस-- ५६ तर हिमाचलमध्ये भाजप--१६ आणि काँग्रेस-- १०

टाईम्स नाऊवर जाहिर केले की मुख्यमंत्री विजय रूपाणी पिछाडीवर गेले आहेत.

सौराष्ट्रमधून आणि उत्तर गुजरातमधून काँग्रेस पुढे आहे तर दक्षिण आणि मध्य गुजरातमधून भाजप. भाजप-- ८०, काँग्रेस-- ५७ हिमाचलमध्ये भाजप--१८ आणि काँग्रेस--१०

भाजप सुरतमधील सगळ्या जागांवर पुढे आहे. सुरतमध्ये पटेलांची संख्या लक्षणीय आहे.

ही निवडणुक रंगतदार होत आहे. आता गुजरातमध्ये आता भाजप-- ७७ आणि काँग्रेस--६३ जागांवर पुढे आहे. भाजप जिंकेल पण २०१२ पेक्षा कमी जागांवर असे दिसत आहे. आता नितीन पटेल पुढे गेले आहेत.

सौराष्ट्रमधील ४८ जागांपैकी काँग्रेस २८ जागांवर तर भाजप २० जागांवर आघाडीवर दिसत आहे. आता भाजप ७७ आणि काँग्रेस ६४ जागांवर पुढे आहे.

सध्या काँग्रेसने सौराष्ट्रमध्ये आघाडी घेतलेली दिसत आहे. भाजप मागच्या वेळेपेक्षा पिछाडीवर दिसत आहे त्याचे कारण सौराष्ट्र आहे. सौराष्ट्र-कच्छ मधून ५४ पैकी ४९ जागांचे कल आले आहेत. काँग्रेस २९ तर भाजप २० जागांवर पुढे आहे. आता भाजप ७९ आणि काँग्रेस ६५ जागांवर पुढे आहे.

आता भाजप ७८ तर काँग्रेस ६६ जागांवर पुढे आहे. बर्‍याच महिन्यांनंतर अशी निवडणुकींमध्ये चुरस बघायला मिळत आहे. विजय रूपाणी राजकोट (पश्चिम) मधून पिछाडीवर आहे.

काँग्रेसने १९८५ मध्ये १४९ जागा जिंकल्या होत्या. त्याखालोखाल २०१२ मधील ६१ जागा ही काँग्रेसची आतापर्यंतची सर्वोत्तम कामगिरी होती. या क्षणी १४८ जागांचे कल हाती आले आहेत. त्यापैकी काँग्रेस ६८ जागांवर आहे. म्हणजे ही काँग्रेसची ३२ वर्षातील सर्वोत्तम कामगिरी असे म्हणायला हरकत नसावी.

आता भाजप आणि काँग्रेस दोघेही ७६ जागांवर पुढे आहेत. हे लिहिता लिहिता काँग्रेस ८० जागांवर तर भाजप ७८ जागांवर पुढे आहे.

आता काँग्रेस ८२ तर भाजप ७७ जागांवर पुढे आहे.

आता काँग्रेस ८४ आणि भाजप ७६ जागांवर पुढे आहे.

आता काँग्रेस ८६ आणि भाजप ७४ जागांवर पुढे आहे. भाजपचे माजी नेते यतीन ओझांनी काँग्रेस ९९ जागांवर पुढे आहे अशी बातमी दिली आहे. मोदी-शहांना हा मोठा धक्का असे म्हणायला हरकत नसावी

आता काँग्रेस-८६ आणि भाजप-- ७७ जागांवर पुढे आहे. सौराष्ट्रमधून काँग्रेस ३३ तर काँग्रेस १७ जागांवर पुढे आहे.

भाजपला आता थोडीफार आशा असेल तर ती मध्य गुजरातमधून. तिथे अजून १० जागांचे कल हाती यायचे आहेत. सौराष्ट्रामधून सगळ्या जागांचे कल आले आहेत. दक्षिण गुजरातमधून जवळपास सगळ्या जागांचे कल आले आहेत.

आता काँग्रेस- ८४ आणि भाजप- ८० असे यशवंत देशमुखांनी जाहिर केले आहे.

आता भाजप- ८४ आणि काँग्रेस-८२

या रोलरकोस्टरवरून छत्तिसगड निवडणुकांची आठवण येत आहे.

आता भाजप- ८६ आणि काँग्रेस-८१

आता विजय रूपाणी आघाडीवर आहेत.

आता भाजप ८७ आणि काँग्रेस ८३ जागांवर पुढे आहे.

आता भाजप ८८ आणि काँग्रेस ८२

काँग्रेस नेते शक्तीसिंग गोहिल मांडवीमधून मागे. तर भाजपचे जितू वाघानी भावनगरमधून मागे. गोधरामधून भाजप पुढे आता भाजप ८८ आणि काँग्रेस ८२

आता उपमुख्यमंत्री नितीन पटेल मेहसाणामधून पुढे.

अजून ११ जागांवरील कल हाती यायचे आहेत. त्या सगळ्या जागा दक्षिण आणि मध्य गुजरातमध्ये आहेत. आता भाजप ८९ आणि काँग्रेस ८० जागांवर पुढे