Skip to main content

तुझ्या ऊन्हाचं कौतुक..

लेखक प्राची अश्विनी यांनी रविवार, 26/02/2017 12:13 या दिवशी प्रकाशित केले.

तुझ्या ऊन्हाचं कौतुक
किती करावं करावं
माप पदरी सुखाचं
किती भरावं भरावं

बघ तुळशीला आल्या
मखमालीच्या मंजिर्या
चिऊताईच्या दातांनी
किती खुडावं खुडावं

खिडकीच्या गजावर
झुले डांगराचा वेल
बोटभर आधारानं
वर चढावं चढावं

नंदी बसलेला दारी
गळी लेणं घुंगराचं
येताजाता भक्तीभावे
तिथं नमावं नमावं

झुल्यावर लेकरांची
किलबिल चारीठाव
सांज सरता सयेने
पाय वळावं वळावं

पुण्य कुठल्या जन्माचं
आज फळुनिया आलं
भरलेल्या गोकुळात
दिस सरावं सरावं

काव्यरस
गाणे
लेखनविषय:
वाचने 11544
प्रतिक्रिया 37

प्रतिक्रिया

माहितगार रविवार, 26/02/2017 17:17

कविता आवडली मस्तच आहे, तुमच्या बनलेही असते राधा, मज कृष्ण भेटला नाही .. अतूट काही... आणि आताची हि कविता स्त्रीत्वातील भारतीयता दाखवते. नको वाटते.. या कवितेतील स्त्री मागत असलेला 'खुला पैलतीर' कवितेची पार्श्वभूमी नाही सांगितली तर स्त्री मुक्ततावादी वाटेल पण कवितेतील 'खुला पैलतीर' अर्थ पारंपारीक भारतीय संकल्पनेतील मुक्ति मागणारा वाटतो.

प्राची अश्विनी यांच्या कविता स्त्रीयांच्या नवीन पिढी पेक्षा एखाद पिढी आधीच्या स्त्रीची भावना रेखाटतात की भारतीय स्त्रीयांची नवी पिढीही या कवितांप्रमाणे विचार करते असा एक प्रश्न सहजच मनात येऊन गेला.

माहितगार रविवार, 26/02/2017 17:21

किंवा नवीन पिढीतील स्त्रीला या कवितेतील भावनांशी नाळ जुळवणे कितपत जमू शकेल ?

प्राची अश्विनी सोमवार, 27/02/2017 07:18

धन्यवाद. पण बापरे , असा विचार केला नव्हता. कदाचित तुमचं म्हणणं बरोबरही असेल.

अनन्त्_यात्री सोमवार, 27/02/2017 09:58

सुन्दर रचना ! फक्त " किलबिल" च्या जोडीला "चारीठाव" हा शब्द (जो चौरस व पोटभर जेवणाच्या सन्दर्भात वापरतात) थोडा खटकला.

प्राची अश्विनी सोमवार, 27/02/2017 10:09

ओह्! बरं झालं सांगितलंत ते. मी सतत असं समजत होते. आता बदलते.:)

श्वेता व्यास मंगळवार, 28/02/2017 16:55

अप्रतिम कविता आहे, मी चारीठाव म्हणजे सगळीकडे, चार दिशांना असं समजत होते.

माहितगार बुधवार, 01/03/2017 08:52

चारीठाव सर्वसाधारण पणे आहाराच्या संदर्भाने वापरला जात असला तरी 'चारीठाव' म्हणजे दिवसातून चार वेळा खाणे अशा अर्थाने येतो का ? म्हणजे चारीठाव या शब्दाचा मूळ अर्थ दिवसाच्या चार वेळा असा असावा असे आता पर्यंत समजत आलो होतो. ऑनलाईन डिक्शनर्‍यांमध्ये हा शब्द मिळाला नाही कुणि छापील शब्दकोशातून सांगू शकेल का ?

माहितगार बुधवार, 01/03/2017 09:08

गूगलले असता चारीठाव हा शब्द चारवेळा, चार दिशा, चौरस आहार, असाही वापरात येऊ लागल्याचे दिसते आहे. मोल्सवर्थातली नोंद मात्र 'चार ही ठाव' (Even the four, the very four, the main or preeminent four, dishes,--भात, भाजी, वरण, पोळी) A term for a decent, comfortable, or respectably-furnished feast or meal:--as disting. from घड्याळ टिपरूं &c. A poor meal--mere bread and a chili.

अशी मिळाली
संदर्भ

शिव कन्या गुरुवार, 01/06/2017 22:03

फार सुंदर आहे सगळं. पण हे कुठेतरी हरवत चाललय हे ही खरे.
बाकी माहितगार - होय, लिहिताना नव्याची उत्सुकता उमटते, पण जुने लोभसवाणे खुणावत राहते.

संजय क्षीरसागर रविवार, 04/06/2017 14:29

हे एकदम बरोबर आहे

झुल्यावर लेकरांची
किलबिल चारीठाव
सांज सरता सयेने
पाय वळावं वळावं

चारीठाव म्हणजे सतत असा अर्थ होतो.

सांजसंध्या रविवार, 04/06/2017 18:03

मस्त मस्त मस्त. बहिणाईंची आठवण झाली.
असं काही वाचल्यावर मग त्यावर आणखी काही नकोच असे वाटते..