अखेर ऑस्करला लिओ भेटलाच

आजचा दिवस संपतांना एक समाधानाची भावना आहे … कारण आहे लिओनार्डो दि काप्रिओ ला सर्वोत्कृष्ट अभिनेत्याचे जे ऑस्कर मिळाले तो क्षण …. अनेक महान अभिनेत्यांना कधीच ऑस्कर मिळाला नाही आहे त्यात लिओ पण येतो कि काय अशी धाकधुक मनाला होती, तसे ऑस्कर काही अभिनयाचे सर्वस्व नाही हे पण वास्तव आहेच पण तरीही अखेर लिओला ती बाहुली मिळालीच !! अधिक कौतुक वाटले ते त्याने केलेल्या मनोगताचे …. उद्योगपती आणि त्यामागे धावणारे जागतिक नेतृत्व आणि त्याला साथ देणारा मानव हे निसर्गाचा जो बळी घेत आहे, त्याचा विचार करण्याचे अत्यंत समर्पक शब्दात लिओनार्डो ने केलेले विवेचन,सगळ अगदी जुळून आले … एका मागून एक उत्कृष्ट चित्रपट देऊन अखेर चिकाटीने त्याने त्याचे स्वप्न पूर्ण केलेच … आणि ६ वेळा नॉमिनेशन मिळून अखेर ऑस्कर ला लिओ भेटलाच, आयुष्यभर मिरवायला …