नमस्कार अमृतातेही पैजा जिंकणाऱ्या आपल्या मायमराठीच्या गौरवदिनानिमित्त आपण मराठी बोलीभाषा सप्ताह २१-२७ फेब्रुवारी दरम्यान साजरा करत आहोत. दर दहा मैलावर भाषा बदलते म्हणतात. मराठी भाषा तर दर प्रांती वेगळ्या लहेजात बोलली जाते. ऐकायला गोड वाटणाऱ्या आणि शब्दकळेने समृद्ध असणाऱ्या या बोली मराठी साहित्याला नेहमीच आगळा साज चढवत आल्या आहेत. भरुभरुन साहित्याचं देणं देत आल्या आहेत.किंबहुना प्रत्येक विषयातील शब्दाला पर्यायी मराठी शब्द देणे हे बोलीभाषेच्या अभ्यासाने नक्कीच साध्य होऊ शकेल. आणि म्हणूनच बोलीभाषा बोलली गेली पाहिजे,लिहिली गेली पाहिजे आणि वाचलीही. याच उद्देशाने निरनिराळ्या बोलीभाषा अवगत असणाऱ्या मिपाकरांना आपल्या बोलीभाषेत उदा. अहिराणी, वर्‍हाडी, चित्पावनी, मालवणी, कोंकणी, पुणेरी, लातुरी, बेळगावी, तंजावुरी, कोल्हापुरी, मावळी, सोलापुरी इ. मध्ये कथा, कविता, लेख लिहुन पाठवायचे आवाहन करीत आहोत. लेख साहित्य संपादक या आय डी ला १५ फेब्रुवारीपर्यंत व्यनि करायचे आहेत. आपल्या भरघोस आणि उत्साहपूर्ण प्रतिसादाच्या प्रतीक्षेत... -साहित्य संपादक