ही पोर ( कविता) रूसली म्हणून खरडलेय काहीतरी ..
कुठूनी उतार नाही
कुठूनी चढाव नाही
रूसली ही पोर तिच्या
भावनांना वाव नाही
तोच तोच दिवस रोज
विसाव्याची बात नाही
गंधाळिल्या मोग-याची
पुन्हा तशी रात नाही
साचलेल्या पाण्याला या
कुठूनी प्रवाह नाही
रूसली ही पोर तिच्या
भावनांना वाव नाही
उन्हाने जो गेला पारा
आरशाला भाव नाही
आठवांची सांज होई
आसवांचा ठाव नाही
खुलले ना शेर अता
गझलेला दाद नाही
हरविले शब्द तिचे
तिची तिला याद नाही
याद नाही दाद नाही
कवितेला नांव नाही
रूसली ही पोर तिच्या
भावनांना वाव नाही
- संध्या
प्रतिक्रिया
7 Mar 2015 - 12:22 pm | विवेकपटाईत
पोर = कविता. बाकी हरवलेल्या कवितेला दाद तरी कशी देणार ?????
7 Mar 2015 - 12:28 pm | ज्योति अळवणी
सुंदर कविता
7 Mar 2015 - 12:58 pm | एक एकटा एकटाच
खुलले ना शेर अता
गझलेला दाद नाही
हरविले शब्द तिचे
तिची तिला याद नाही
मस्त
7 Mar 2015 - 1:23 pm | प्रचेतस
कविता आवडली.
'याद' सारखा हिंदी शब्द खटकला.
बाकी वृत्त 'आनंदकंद' का?
8 Mar 2015 - 11:16 pm | सांजसंध्या
आनंदकंद नाही.
अष्टाक्षरी आहे.
7 Mar 2015 - 1:40 pm | अत्रुप्त आत्मा
:)
7 Mar 2015 - 4:03 pm | एस
वाहवा!
7 Mar 2015 - 4:35 pm | संदीप डांगे
जबरदस्त भाव आणि गेयता आहे. सहज चालीत गुणगुणून पाहिले, गोड वाटले.
7 Mar 2015 - 4:45 pm | चौकटराजा
कवितेच्या उदगमाने
गेल्या दिसांची सय ग आली
मधुकरांच्या गुंजारवाने
आसमंता लय ग आली
7 Mar 2015 - 8:29 pm | खटासि खट
व्हॉट डू यू मीन ? भुंगे ऑन फूल्स ? *shok*
7 Mar 2015 - 4:49 pm | ज्योति अळवणी
सुंदर कविता
8 Mar 2015 - 7:41 pm | सौन्दर्य
'आठवांची सांज होई
आसवांचा ठाव नाही'
शब्दांचा खेळ एकदम मस्त. कविता आणि चित्र दोन्हीही सुंदर.
8 Mar 2015 - 10:18 pm | चाणक्य
कविता. ब-याच दिवसांनी लिहीलंत? खरंच पोर रूसली होती की काय?
8 Mar 2015 - 11:17 pm | सांजसंध्या
सर्वांचे मनापासून आभार.
@चाणक्य - ही पोर सगळं रूटीनमधे चालू असेल तर रूसते, जगावेगळं आहे सगळं हिचं..