Skip to main content

हिशोब..

लेखक चुकलामाकला यांनी गुरुवार, 11/12/2014 16:29 या दिवशी प्रकाशित केले.

मी जन्मांचा विचार केला ,तुझी धाव पण वर्षांपुरती
कसे निभावू नाते अपुले ,परतुनी आले अर्ध्यावरती …

किती विनवण्या, किती अबोले, एका छोट्या पत्रासाठी
हट्ट पुरवी तू अखेरीस पण पत्ता दुसरा पत्रावरती…

शब्द असे तू उधळीत जाशी, जशी फुले वा माणिक मोती
फसवे तरीही वेचीत गेले, माया केली अर्थांवरती …

उगाच वेडा जीव लावला ,अशी कशी मी विसरून गेले ,
कितीही गुणले शून्याला तरी हाती अपुल्या शून्यच उरती...

काव्यरस
मराठी गझल
लेखनविषय:
वाचने 3559
प्रतिक्रिया 14

प्रतिक्रिया

आयुर्हित गुरुवार, 11/12/2014 17:17

अरे व्वा! ! गज़ल छान जमली आहे.

पत्ता दुसरा पत्रावरती…
अरेरे, वाईट वाटले वाचून....

पण काही हि म्हणा, गणित पक्के आहे हो आपले!

अत्रुप्त आत्मा रविवार, 14/12/2014 00:55

@शब्द असे तू उधळीत जाशी, जशी फुले वा माणिक मोती
फसवे तरीही वेचीत गेले, माया केली अर्थांवरती … >>> मार डाला!

@उगाच वेडा जीव लावला ,अशी कशी मी विसरून गेले ,
कितीही गुणले शून्याला तरी हाती अपुल्या शून्यच उरती... >>> स्वाल्लिड!!!

चाणक्य रविवार, 14/12/2014 03:00

भावना चांगल्या मांडल्या आहेत. अजून एक शेर लिहा म्हणजे गजल पूर्ण होईल. गजलेत किमान ५ शेर हवेत.

चुकलामाकला रविवार, 14/12/2014 14:26

धन्यवाद ! पाचवा शेर लिहिला होता ,
ओढ नभाची कधीच विरली, उंच उंच मी उडते तरिही
नको कुणा नजरेत यावया, जखमा माझ्या पंखावरती
पण ... नाही प्रकाशित केला .
अब्दुल अहद साज यांचा शेर आठवला ,
शेर अच्छे भी कहो, सच भी कहो, कम भी कहो
दर्द की दौलते नायब को रुसवा न करो

अनुप ढेरे शुक्रवार, 19/12/2014 10:53

ओढ नभाची कधीच विरली, उंच उंच मी उडते तरिही
नको कुणा नजरेत यावया, जखमा माझ्या पंखावरती

भारी!!

संपादकांना सांगून मूळ धाग्यात टाकाना हा शेर.

होकाका रविवार, 14/12/2014 22:56

कविता वाचायला आवडली पण नीटशी कळली नाही...
तशा कुठल्याच कविता कळत नाहीत - आणि त्यातही गझल म्हणजे अगदीच अनाकलनीय.
ही सुद्धा त्यापैकीच एक.

उदाहरणार्थ:
१) "परतुनी आले अर्ध्यावरती" यात कोण परतून आले? 'मी' की 'नाते'? आणि का?
२) "... एका छोट्या पत्रासाठी" यात कोणत्या पत्राचा उल्लेख आहे? कोणत्या संदर्भात? आणि का?
३) "हट्ट पुरवी तू अखेरीस पण पत्ता दुसरा पत्रावरती…" कसला हट्ट? आणि दुसरा पत्ता म्हणजे? पहिला पत्ता कोणता? आणि दुसरा कोणता?
४) "ओढ नभाची कधीच विरली, उंच उंच मी उडते तरिही" .. उंच उडत असल्यावर नभाची ओढ कशी राहील?
अजूनही काही प्रश्ण आहेत. पण राहून्दे...

चुकलामाकला शुक्रवार, 19/12/2014 09:21

हं ! कवितेचा अर्थ प्रत्येकाचा वेगळा असू शकतो . हा माझा अर्थ
ही गझल / कविता स्त्रीच्या मनातली आहे.
१ कुठल्याही नात्याकडे पाहण्याचा दोघांचा दृष्टीकोन जर वेगळा असेल तर ते नाते फुलू शकत नाही . म्हणून नाते कुजू देण्यापेक्षा मी अर्ध्यावरून परतायचे ठरविले .
२ तू मला पत्र लिहावे म्हणून मी कितीतरी वेळा तुला विनवण्या केल्या . शेवटी तू पत्र लिहिलेस खरे , पण मला नाही तर दुसऱ्याच कुणाला .
३ कधी जपून तरी कधी मुक्तपणे तू माझ्यावर शब्द उधळत गेलास मला जरी त्या मागचा तुझा खोटेपणा कळला तरी त्यात शब्दांची काय चूक? मी त्यांच्या अर्थावर नेहमीच माया केली .
४ ज्या नात्यांना नाव नाही ओळख नाही , अशी नातीही असतात, म्हटले तर शून्यासारखी . कधी कधी त्यातून हाती काहीच लागत नाही . हे माहित होते तरीही …
५ आकाशात उडायची इच्छा आता राहिली नाही तरीही मी उंच उडते कारण खाली उतरले तर माझ्या पंखावरच्या जखमा लोकांच्या नजरेत येतील . इतरांच्या मनातील माझी आनंदी, स्वच्छंदी ही प्रतिमा मला पुसायची नाही --