श्री - भाग १

"श्री आपण नाही भेटू शकत आता कधीच" "पण का ? मला बोलायचं आहे खूप तुझ्याशी." "तुझ्या बायकोशी खोटं बोलून येणार आहेस न तू ..मला तेच नकोय.तिला खूप वाईट वाटेल रे. आपण नाही भेटायचं कधीच ..जे काही सुंदर क्षण होते ते तसेच ठेवू या.काय झालं,कसं झालं हे सगळ्या प्रश्नांना आता काही उत्तर नाही . तू सुखात आहेस ,माझ्यासाठी तेच खूप आहे . " "मीतू तुला एक सांगू ? " "सांग ना." "तू तशीच आहे माझ्यासाठी जशी भेटली होतीस पहिल्यांदा .काहीच नाही बदललं. सोडून गेलीस तेव्हा खूप राग आला तुझा. खुप तिरस्कार केला .पण तुझ्या वर प्रेम करणं नाही थांबवू शकलो." "आपण या विषयावर नको बोलूया आता ." "मीतू नीट राहशील ना ? मी तुला सांगितलेलं विसरू नकोस .तुझी काळजी घे आणि कधीहि बोलावसं वाटल तर मी आहे ." श्री .. माझा सर्वस्व होता. आहे अजूनही..नेहेमीच कमी लेखलेल्या मुलीसाठी तो खूप काही होता ..कारण तो एकटाच तिचा होता . आई च्या दृष्टीनी मी तिचं राग काढायचे हक्काची जागा होते .बाबांच्या दृष्टीनी मी चार चौघात नेण्यासारखी नव्हते कधीच ..सगळ्याच गोष्टीत सुमार असणाऱ्या पोरीला चार चौघात न्यायची त्यांना लाजच वाटायची..सगळ्या गोष्टींची उणीव माझी धाकटी बहिण भरून काढायची ..आणि मग मी माझ्याच कुटुंबात उपरी व्हायचे. खूप कणखर झाले होते हळू हळू. आई रागावली कि डोळ्यातलं पाणी दिसू न देत हसायला शिकले .. निर्लज्ज झाले ..एकटी होतेच पण ते प्रत्येक वेळेला जाणवायला लागलं होतं. अचानक तू आलास .आणि सगळं काही बदललं .. (क्रमशः...)