Skip to main content

ऐक सखे

लेखक अमेय६३७७ यांनी गुरुवार, 28/11/2013 22:21 या दिवशी प्रकाशित केले.

कशाला उसासे हवे आर्जवांचे  
नवी वागण्याची तर्‍हा ही कशी
उगा श्वास श्वासांस जाळीत येतो 
फिरे जो तुझा हात देहानिशी 

तिथे चंद्र माथी चढूनी नभाच्या 
मनासारखे चांदणे शिंपुदे 
रतीला म्हणावे तुझ्या साजणाचे 
जरासे निखारे विखारास दे  

प्रिये खेळ आहे खरा संयमाचा 
कसे आवरावे कळेना तुला 
अगे मंद चालीतली रागदारी 
असे ही नव्हे हा स्वरांचा झुला 

जसे मोगर्‍याने फुलावे सुखाने 
तसे वाढवूया निशेला सखी  
हळू माधुरीचे भरू देत प्याले 
उधाणास येऊ नको सारखी   

-- अमेय

लेखनविषय:
वाचने 5065
प्रतिक्रिया 17

प्रतिक्रिया

संजय क्षीरसागर गुरुवार, 28/11/2013 23:19

लयीचं सुरेख भान आणि समर्पक शब्द योजना आहे. अनुभवानं अजून आषयघन करता येईल.

संजय क्षीरसागर शुक्रवार, 29/11/2013 00:59

तरलता आशय सघन करत नेते. मग कविता मिस्टीकल होते.

सूड शुक्रवार, 29/11/2013 17:08

छान !! पण तुमच्या करुण रसाच्या कविता वाचताना जसं आपसूकच 'वाह !!' येतं तसं नाही वाटलं.
बाकी करुण असो वा शृंगारीक, लयबद्धता वाखाणण्यासारखी आहे.

अत्रुप्त आत्मा रविवार, 01/12/2013 15:48

पुन्हा एकदा वाचली! :)

जसे मोगर्‍याने फुलावे सुखाने
तसे वाढवूया निशेला सखी
हळू माधुरीचे भरू देत प्याले
उधाणास येऊ नको सारखी >>> सलाम हाय राव सलाम! __/\__