Skip to main content

मोहोळ

लेखक जयवी यांनी गुरुवार, 26/04/2012 12:06 या दिवशी प्रकाशित केले.

आठवणींचं मोहोळ
आज फुटलं फिरुन
सयी छळती जीवाला
डंख मारुन मारुन

जखमा जुन्या पुराण्या
पुन्हा नव्याने सलती
भळाभळा लागे वाहू
जरी खपली वरती

कधी आसूड शब्दांचे
गेले कातडी सोलून
कधी कुणी फसविले
गळा केसाने कापून

घाव वर्मावर झाले
काही काळजाच्या पार
परी दुखावून गेले
सग्या सोयर्‍याचे वार

सार्‍या कटू आठवांचे
येई मळभ दाटून
होई चित्त सैरभैर
राही काळोख भरुन

ओझे झाले पापण्यांना
काळ्या सावळ्या ढगांचे
कोसळे झडझडून
मन ऋणी आसवांचे

जयश्री

काव्यरस
करुण
लेखनविषय:
वाचने 1690
प्रतिक्रिया 8

प्रतिक्रिया

निश गुरुवार, 26/04/2012 17:43

जयवी जी , अतिशय आशयघन कविता आहे.

अस म्हणावेसे वाटते

जगण्यातले दुख
जगुनच कळते

सुखावरही भारी
दुखाचेच काटे....