Skip to main content

तोच थंडगार भात

लेखक विदेश यांनी मंगळवार, 27/12/2011 या दिवशी प्रकाशित केले.
(चाल : तोच चन्द्रमा नभात ) तोच थंडगार भात तीच प्लेट पाहुनी एकांती मजसमीप तीच भीति का मनीं ! खारट चटणी तशीच रोज तेच भांडणे पोळ्यांनी सोडियले नीट येथ भाजणे भाजीचा गंध तोच तीच कुबट फोडणी ! सारे जरि ते तसेच संधि आज ती कुठे ? मीहि तोच, तीच तीहि, दुसरी मेस ती कुठे ? ती कपात ना दरात अश्रु दोन लोचनी ! त्या पहिल्या आम्टीच्या आज लोपल्या खुणा डाळ ह्या जलात व्यर्थ मूढ शोधतो पुन्हा नीट ये न ते कळून भंगल्या भुकेतुनी ! ( पूर्व प्रसिद्धी- शब्दगाssरवा २०११)
काव्यरस
करुण
लेखनविषय:
वाचने 2091
प्रतिक्रिया 13

प्रतिक्रिया

अन्या दातार बुधवार, 28/12/2011
Mess is always a mess असे मी नेहमीच वर्णन करत असतो. तुम्ही आज ते काव्यातून मांडलेत. धन्यवाद. :)

सर्वसाक्षी बुधवार, 28/12/2011
झकास विडंबन. पोळ्यांनी सोडियले नीट येथ भाजणे> हे विशेष आवडले. अनेकदा पोळ्या करणार्‍या बायांनाही हा रोग लागतो खरा.

प्रास बुधवार, 28/12/2011
विदेशराव, खूपच झक्कास विडंबन. शब्द न् शब्द चातुर्याने योजलेला आहे आणि छंद अतीव चपखल बसवला आहे.
त्या पहिल्या आम्टीच्या आज लोपल्या खुणा डाळ ह्या जलात व्यर्थ मूढ शोधतो पुन्हा नीट ये न ते कळून भंगल्या भुकेतुनी !
हे विशेष आवडलेले आहे. यातल्या प्रत्येक ओळीतून त्या काळच्या मनातलं कारुण्य ओथंबून वाहत आहे. आपण तुमच्या कवितांचे फ्यान आहोतच हे वे. सां. न.

वाहीदा बुधवार, 28/12/2011
तुम्हाला पोळी नेहमीच करपलेली किंवा कच्चीच गिळावी लागते काय ? आमटीची फ़ोडणी जळालेली असते का ? भाजी ची फ़ोडणी ही कुबट वाटते का ? तर मग वेळ का दवडता ? आता आसवे गाळणे थांबवा गणपाशेफ़ ऑनलाईन क्लासेस येथे त्वरित संपर्क साधा http://kha-re-kha.blogspot.com/ ;-)

सूड बुधवार, 28/12/2011
मस्तच केलंय !! सैंपाकी अज्ञातवासात काही आठवडे अशा सैंपाकाची टेस्ट घेतल्या गेली आहे. :D

मदनबाण बुधवार, 28/12/2011
:)

पार्टनर बुधवार, 28/12/2011
लाजवाब, चवदार विडंबन ! -पार्टनर