Skip to main content

तोच थंडगार भात

लेखक विदेश यांनी मंगळवार, 27/12/2011 23:13 या दिवशी प्रकाशित केले.

(चाल : तोच चन्द्रमा नभात )

तोच थंडगार भात तीच प्लेट पाहुनी
एकांती मजसमीप तीच भीति का मनीं !

खारट चटणी तशीच रोज तेच भांडणे
पोळ्यांनी सोडियले नीट येथ भाजणे
भाजीचा गंध तोच तीच कुबट फोडणी !

सारे जरि ते तसेच संधि आज ती कुठे ?
मीहि तोच, तीच तीहि, दुसरी मेस ती कुठे ?
ती कपात ना दरात अश्रु दोन लोचनी !

त्या पहिल्या आम्टीच्या आज लोपल्या खुणा
डाळ ह्या जलात व्यर्थ मूढ शोधतो पुन्हा
नीट ये न ते कळून भंगल्या भुकेतुनी !

( पूर्व प्रसिद्धी- शब्दगाssरवा २०११)

काव्यरस
करुण
लेखनविषय:
वाचने 2127
प्रतिक्रिया 13

प्रतिक्रिया

पक पक पक बुधवार, 28/12/2011 08:35

त्या बॅचलर लोकांच अंतःकरण उलगडुन दाखवलत आज, वा ! वा!! जुने दिवस आठ्वले...मजा आली.

विदेश राव धन्यवाद..

सर्वसाक्षी बुधवार, 28/12/2011 10:16

झकास विडंबन.

पोळ्यांनी सोडियले नीट येथ भाजणे> हे विशेष आवडले. अनेकदा पोळ्या करणार्‍या बायांनाही हा रोग लागतो खरा.

प्रास बुधवार, 28/12/2011 12:03

विदेशराव,

खूपच झक्कास विडंबन. शब्द न् शब्द चातुर्याने योजलेला आहे आणि छंद अतीव चपखल बसवला आहे.

त्या पहिल्या आम्टीच्या आज लोपल्या खुणा
डाळ ह्या जलात व्यर्थ मूढ शोधतो पुन्हा
नीट ये न ते कळून भंगल्या भुकेतुनी !

हे विशेष आवडलेले आहे. यातल्या प्रत्येक ओळीतून त्या काळच्या मनातलं कारुण्य ओथंबून वाहत आहे.

आपण तुमच्या कवितांचे फ्यान आहोतच हे वे. सां. न.

वाहीदा बुधवार, 28/12/2011 12:04

तुम्हाला पोळी नेहमीच करपलेली किंवा कच्चीच गिळावी लागते काय ?
आमटीची फ़ोडणी जळालेली असते का ?
भाजी ची फ़ोडणी ही कुबट वाटते का ?
तर मग वेळ का दवडता ? आता आसवे गाळणे थांबवा
गणपाशेफ़ ऑनलाईन क्लासेस येथे त्वरित संपर्क साधा
https://kha-re-kha.blogspot.com/ ;-)