बेटावर एकटेपणाच्या ============= बेटावर एकटेपणाच्या धुमसे ज्वालामुखी स्मृतींचा ढळलेली उल्का झळझळती, अनाहूत कोसळून विझे आदिम इथली जमीन शापित हवा भारली, पाणी मंत्रित दिशा कुंठल्या, कातरवेळी घनगंभीर पडघम वाजे का धुपला नि:संग किनारा? का उसासतो जखमी वारा? अदम्य आशेचा निर्झर का क्षणैक उसळे, पुन्हा थिजे? ओथंबून बेटावर जेव्हा झरे केशरी पुनवचांदवा अपार करुणेच्या वृक्षाचे बीज कोवळे कुठून रुजे?