Skip to main content

आज

लेखक क्रान्ति यांनी गुरुवार, 12/03/2009 22:58 या दिवशी प्रकाशित केले.
नक्कीच काहीतरी चुकतय आज कशान हे मन वेड दुखतय आज? कधीच्या सुचलेल्या दोनच ओळी पिंगा घालतात भलत्याच वेळी अनावर रात्री चांदण्याची खेळी सृजनाच सुख सुद्धा खुपतय आज! मनातल गाणही ओठांवर नाही सुरांच गाव कुठे दूरवर राही उजाड माळ का वाट माझी पाही? आभाळही पापण्यांत झुकतय आज! उदास झाडांची गळतात पानं निस्तेज चंद्राच वितळून जाणं धुक, जस दुखणं जुनं-पुराणं उफाळून पुन्हा का सलतय आज?
Taxonomy upgrade extras
प्रकटन
लेखनविषय:
वाचने 4128
प्रतिक्रिया 14

प्रतिक्रिया

प्राजु गुरुवार, 12/03/2009 23:24
फार फार फारच सुंदर...! उजाड माळ का वाट माझी पाही? आभाळही पापण्यांत झुकतय आज! अप्रतिम..! उदास झाडांची गळतात पानं निस्तेज चंद्राच वितळून जाणं धुक, जस दुखणं जुनं-पुराणं उफाळून पुन्हा का सलतय आज? जबरदस्त!!!!!! हॅट्स ऑफ! काय बाय सांगू? कसं गं सांगू... काही तरी होऊन गेलंय आज.. याची आठवण झाली. - (सर्वव्यापी)प्राजु http://praaju.blogspot.com/

बिपिन कार्यकर्ते गुरुवार, 12/03/2009 23:36
क्रांतिबै, झक्कास लिहिता तुम्ही. मस्त. कधीच्या सुचलेल्या दोनच ओळी पिंगा घालतात भलत्याच वेळी बिपिन कार्यकर्ते

चतुरंग गुरुवार, 12/03/2009 23:38
सुंदर कविता! कधीच्या सुचलेल्या दोनच ओळी पिंगा घालतात भलत्याच वेळी अनावर रात्री चांदण्याची खेळी सृजनाच सुख सुद्धा खुपतय आज! क्या बात है!! केव्हापासूनचं मनात पडलेलं कल्पनेचं बीज हे कोणत्यातरी बेसावध क्षणी असं कवितेच्या रुपानं उगवतं. निर्मितीचं गुपितच एकप्रकारे सांगणार्‍या ह्या ओळी फार भावल्या! तुमच्या साध्या शब्दातल्या कविता थेट भिडतात!! जियो!!! चतुरंग

जयवी शुक्रवार, 13/03/2009 00:48
सृजनाच सुख सुद्धा खुपतय आज ....... अगदी अगदी :) आज काय बाई होतंय आमच्या क्रांतिला........;)

प्रमोद देव शुक्रवार, 13/03/2009 08:14
:) आम्ही कोणत्याही कंपूत नाही. कारण आमचा स्वतःचाच एक कंपू आहे. ;)

क्रान्ति शुक्रवार, 13/03/2009 21:33
आज खरच खूप छान वाटतय. इतक्या सगळ्या रसिक आणि गुणग्राही मित्रांक्डून माझ्या वेड्यावाकुड्या अक्षरांच इतक कौतुक होतय! माझे जुने दिवस परत आलेत! सगळ्यांना धन्यवाद देण्यापेक्षा या ॠणात रहाण मला जास्त आवडेल. क्रान्ति {मी शतजन्मी मीरा!}