बिल्ला आणि नाग..!!

............................. आत्ताचे जवळ जवळ सगळे सिनेमे खूप सेन्सिबल असतात..मजा नाही येत.. कुठे गेले ते माझे लाडके सिनेमे..?? ज्यामधले नायक आणि खलनायक खूप नियम आणि पथ्यं पाळतात.. १) हीरो किंवा हिरोईन... टेप,सी.डी. किंवा लपून काढलेले फोटो असा जो काही कलियुगातील सर्व दुष्टतेविरुद्ध पुरावा असेल तो क्रूरकर्मा खलनायकांच्या मधोमध उभे राहून उंच करून दाखवतात आणि "ललकारतात" की "तेरे दिन भर गए है राका!! (किंवा प्रलयनाथ.. किंवा ठकराल..!!)..मैंने तेरी सारी बातें इस टेप में रिकॉर्ड कर ली है.. अब इस सबूत के जरिये में तुझे फांसी के तख्ते तक पहुन्चाके रहूँगा..में अभी ये टेप पुलीस के हवाले करने जा रहा हूँ..!!" २) राखी टाईप कोणीतरी आई मरता मरता आपल्या भावी "मेन हीरो" मुलाला एकदम लास्ट्च्या क्षणी एक माहिती सांगते.. ज्या लोकांनी तिला मारले आणि एकूण त्यांचं खानदान "तबाह" करण्यासाठी जे जे वाईट करता येईल ते केलं..(उदा. वडिलांचा खून..बहिणीवर बलात्कार..अर्थातच बहिणीची consequent आत्महत्या..आईला विष चारणे..वगैरे) त्या लोकांची नावं आहेत बिल्ला आणि नाग.. ढँग... !!! आता बस बोंबलत शोधत कोण बिल्ला आणि नाग आहेत त्यांना..आडनाव आणि साधारण पत्ता तरी सांगितला असतां आयशीनं तर ..?? म्हणजे बुवा कुर्ला वेस्ट, कोपरखैरणे, रबाळे... असा निदान एरिया तरी सांगायचा.. पण नाही.. शोध मेल्या.. ३) नुकताच बलात्कार झालेली तरुणी (हिरोइन नव्हे बरं का.. हीरोची बहीण..) .. हिला क्रूरकर्मा शक्ति कपूर ने जिवंत सोडलं आहे आणि तो बिचारा कर्तव्य करून निघून चालला आहे.... पण तिथल्यातिथे ती त्याला ऐकवतेय की में तेरा ये काला चेहरा समाज के सामने लाकर रहूंगी.. किंवा तेरी शराफत का पर्दाफाश करूंगी..!!" मग तो परत फिरतो.. मरते बिचारी...!! नाहीतरी निर्माता, दिग्दर्शक आणि पटकथा लेखकाच्या मनातून तिला मारायचंच असतं काहीतरी करून.. ४) लहान मुलगा.. "मास्टर बंटी" छाप..अत्यंत इनोसंट.. पण अत्यंत अडचणीचे आणि मुद्द्याचे प्रश्न विचारतो.. उदा..मम्मी मम्मी.. क्या येही मेरे पापा है? किंवा.. मम्मी मम्मी ... पापा हमारे साथ क्यूँ नही रहते ..?? किंवा.. पापा पापा.. क्या हम आंटी को मेरी मम्मी बना सकते हैं ?? (हा फायद्याचा प्रश्न आहे बापाच्या दृष्टीने..) ५) खलनायक हा अत्यंत कष्टपूर्वक जास्तीत जास्त वाईट गोष्टी एकाच वेळी करत असतो. मुळात तो दारू पीत आणि दोन उन्हाळी कपडे घातलेल्या बायकांकडून मालिश करून घेत आणि शक्य झाल्यास कैबरे बघत बसलेला असतो.. मग त्याचे भयंकर साथीदार येतात..मीटिंग होते.. मीटींगची सुरुवात एखाद्या गद्दाराला गोळी घालून होते.. मग एकूण मिनिट्स ऑफ़ मीटिंग वरून आपल्याला कळतं की त्यांचा सरहद्पार कडून ड्रग्स, हत्यारं आणि जाली नोटा आणण्याचा व्यवसाय असतो.. नुसते चार पैसे कमावायाचे असा क्षुद्र उद्देश न ठेवता सामाजिक बांधिलकीतून हे ड्रग्स तरुण पिढीला स्वस्तात उपलब्ध करून देणं..मग तरूण पिढी तबाह झाल्यावर आणि "जाली" नोटांमुळे देश "खोखला" झाल्यावर "हथियारां" च्या वापरानं त्याच्यावर "राज" करणं अशा महत्वाकांक्षी योजना ते राबवत असतात.. आन्त्रप्रिनरशिप म्हणतात ती हीच ना..? खलपुरुषांची एक अत्यंत मोहक सवय म्हणजे आपली सर्व कुटील कारस्थानं दारु पीत पीत आपापसात डिस्कस करणं..वाह.. पुत्र : पापा आपकी रोनेकी एक्टिंग को तो दाद देनी पड़ेगी.. पिता : हाँ बेटा..यह सब मैंने ही किया..मैंनेही चमेली को राजा के पास भेजा.. मैनेही राजा के दूध में नशे की दवाई मिलाई..और वो फोटोग्राफ्स भी मैंने ही छुपकर ली थी.. पुत्र : वा पापा.. दो प्रेमियों के बीच शक और नफ़रत का जहर भरने का आप का आयडिया कमाल का है.. पिता : अब किरण राजा के मुँह पे थूकेगी भी नही..वो तुझे मिल जायेगी..और उसके साथ उसके बाप का पैसा भी.. इसे कहते है एक तीर में दो पंछी..उसके बाप के साथ मेरा पुराना हिसाब भी चुकता हो जायेगा..मैंने जब किरन की माँ का खून किया था तब उसीने मेरे खिलाफ गवाही दी थी.. झालं.. दारामागून लपून ऐकणाय्रा व्यक्तीच्या हातून ग्लास खाली पडलाच पाहिजे.. आणि कोणी टेपरेकोर्डर घेऊन आलंच असेल तर पुरावा ही "दर्ज" झाला.. हाच खलपुरूष लास्ट्च्या मारामारीआधी कित्ती जमवाजमव करतो.. मुळात हीरोला अंगावर ओरखडाही पङता काच खळ्ळकन फोडून आत एंट्री मिळावी म्हणून खर्च करून एक काच बसवून घेतो हलकीशी ठिसूळशी.. मग तो हिरोच्या आईला, (जिवंत असल्यास) बहिणीला,हीरोनं लग्न केलं असल्यास त्याच्या बायकोला आणि नसल्यास प्रेयसीला शिवाय (झालं असल्यास) मुलालाही असतील तिथून गोळा करून आणतो.. हिरोला बाप कधीही नसतो.. त्यामुळे तेव्हढं एक काम कमी होतं.. मग हां खलपुरूष बिल्ला सगळ्यांना खांबाना बांधतो.. योग्य वेळेला पेश करण्यासाठी..!! जुन्या मिल मधे असंख्य ड्रम्स गडगडवून प्रचंड चोपाचोपी झाल्यावर जेव्हा हीरोच्या हातात बंदूक येते.. तेव्हा "बाजी" उलटवण्यासाठी ही अरेंजमेंट आधीच करून ठेवलेली असते.. प्लानिंग अहेड इज द इसेन्स.. "ज़रा एक नजर अपने पीछे डालो..और चुपचाप हथियार फेंक दो.." पलटली ना बाजी?? मग कर्तबगार व्हिलन हीरोला ही त्याच लायनीत बांधून त्याच्या आयटेमला (हीरोईनला) आयटेम सॉंग वर सर्वांसमोर नाचवतो सुद्धा.. शेवटी कुत्रा, कबूतर, हत्ती किंवा जोनी लिव्हर वगैरे येऊन सगळ्यांची सुटका करेपर्यंत नाच चालू राहतो.. ...........