अविभाज्य अमेझोनचा (Amezon Prime) सन्माननीय सदस्य म्हणून कंपनीने सुचना पाठवली की भोला सिनेमा आपण चकटफू बघू शकता. हल्ली ही कंपनी सुद्धा भारी लब्बाड झालीयं.सिनेमे भाड्या ने(मुळ शब्द भाडे याचे ब.व.,घराचे भाडे,बसचे भाडे सारखे) किंवा विकतही देतात. पहिल्यांदा असे काही नव्हते.अ.प्रा वर पुर्व प्रकाशित २१ सरफरोश मी फुकट पाहीला पण आता मात्र पैसे मोजावे लागतात.(बरे झाले मी लवकर पाहीला) साX, विपणन तज्ञ (Marketing Expert) सुद्धा एक भारीच जमात आहे.आपला ढोल आणी ग्राहकाचा बॅण्ड कसा जोरात वाजवायचा यांना बरोबर समजते. खुल्या चित्रपटगृहाची सवय, बंद चित्रपटगृहांत बसवत नाही.आता अंतरजालावर सोईस्कर वाटते. ना ड्रेस कोड,ना वाहातूक कोंडीचा झोल,ना समय की पाबंदी.गाजराची पुंगी,आवडला तर ठीक, बघायचा नाही तर यादीतून काढून टाकायचा. खूप आवडला तर एकाच बैठकीत नाहीतर मग सवडी नुसार,तुकड्या तुकड्यांनी. दुपारच्या जेवणानंतर वामकुक्षी, तत्पूर्वी थोडावेळ अ.प्रा.बघणे हा खरं पाहिलं तर नित्यक्रम.भोला चित्रपट बघावा म्हणून टिचकी मारली.तसा हा चित्रपट मार्च मधेच सिनेमागृहात प्रकाशीत झाला होता पण अ प्रा वर आताच आलायं. Bholaa, an ex convict endeavours to meet his daughter for the first time...... Blah,Blah गणमान्य सितारे,अजय देवगण, तब्बू ,कनिश्ठ बच्चन (गेश्ठ आपियरन्स) मधे वगैरे वगैरे वाचून वाटले आजची दुपार चांगली जाणार असे वाटले. वाटलं,राजश्री पिक्चर्स सारखी एखादी कौटुंबिक इश्टोरी असावी. म्हंजे असं बघा की,एक हॅप्पीली मॅरीड कपल,हम दो हमारा दो,असं म्हंजे सगळं काही मस्त आनंदात वगैरे चाललं असताना म्हंजे मधेच काहीतरी लोचा होणार वगैरे,म्हंजे बघा की कसे,नवरा लाच खाण्याच्या खोट्या आरोपात, किंवा खोट्या खुनाच्या आरोपात तुरूंगात वगैरे असे काही तरी. (इथे तुम्हाला कदाचित हास्यकवी नायगावकर काकांची आठवण येऊ शकते). पण असे काहीच नाहीये. थांबा सांगतो पण थोडं हं. चित्रपटाची सुरवातच लई भारी, हिरोईन,जांबाज पोलीस अफसर. टिप (सुचना) मीळते म्हणून हेरॉईन का काय ते पकडायला फोर्स घेऊन पाठलाग करतेयं,कधी बदमाश पुढे, कधी पोलीस मागे,कधी पोलीस मागे तर बदमाश... बदमाशांचा ट्रक महामार्गा वरून भरधाव पळतोयं पण रस्त्यावर इतर कुठल्याच गाड्या दिसत नाही. फक्त ट्रक व पोलिसांच्या आठ दहा आर्मडा, एका मागोमाग होत ट्रकला घेरण्याचा प्रयत्न करतात.दोन्ही बाजुने अंदाधुंद गोळीबार चालू , अगदी फार्मुला वन सारखी शर्यत बघायला मीळते. कधी बदमाशांचा नेम बरोबर तर कधी पोलिसांची गोळी किसी बदनसिब बदमाश का सिना छलनी करताना दिसते.बदमाशाची एक गोळी हिरॉईनच्या खांद्याला चाटून जाते ( काश मै वो काडतूस होता. असा एक फडतूस विचार क्षणभर मनाला चाटून गेला. आता मनाचं काय हो! सुधीर मोघे म्हणतात, मन गरगरते आवर्त, मन रानभूल मन चकवा...).बहादूर हिरोईन अस्पताल जात नाही पण आर्म स्लिंग पट्टी (हात लटकवायची पट्टी) कुठूनतरी, कोणीतरी आणून देते ( काय की बुवा, स्पाॅट ब्वाय,मेकप मॅन).हायला खांदा जखमी झाला तर फिगर ऑफ एट्ट पट्टी बांधायला हवी पण आर्म स्लिंग पट्टी का दिली असावी हे अजूनही मला कळाले नाही.जाऊ द्या आपल्याला काय करायचंय.शेवटी काळा चश्मा घातलेली जखमी बहादूर हिरोईन आपली गाडी ट्रकच्या समोर आणते व समोरून ड्रायव्हरला गोळी घालते. मग पुढे दोन तास,एकुण साठ (५९) मिनीटे हिरोईनचा हात पट्टी मधेच लटकलेला तो सुद्धा उजवा. हिरोईनचा एक खांदा जायबंदी असल्याने इकडून तीकडे पळा पळीचे नृत्य किंवा झाडाला लपेटत गाणे म्हणणे वगैरे असे काही प्रसंग चित्रीत केलेले दिसत नाही (Very original नं). बदमाशांचा ट्रक ताब्यात घेण्यात पोलीस यशस्वी होतात.कमिशनर खुश, घरी जंगी पार्टी वगैरे. ट्रक मधले सामान पोलीस चौकीत. चौकी बहुदा साहेबांच्या म्हणजे स्वातंत्र्यपूर्व काळातील. पोलिसांचा खबरी डाॅनच्या गोटात पण डाॅनचा खबरी,बदमाश पोलीस मात्र पोलिसांच्याच गोटात . असो, कोणीतरी,माहीत नाही कोणी पार्टीच्या दारू मधे झोपेचे औषध मिसळतो.एन्टीबायोटीक घेतले असल्याने हिरोईन मद्यपान करत नाही व बाकीचे पोलीस तीस एम एल मधेच आडवे पडतात व झोपेची एक्टींग मस्त करतात.(हायला आम्हाला पण झोपेची एक्टिंग भारी येते. दुपारी झोप येत नाही पण दुपारचा चहा बनवायचा असेल तर....). अरे, सगळी ईश्टोरी सांगीतली तर तुम्ही शिणेमा कशाला बघाल.पण तरी थोडीशी सांगतो, इथेच आपल्या हिरोची (भोला)हिरोईनशी भेट होते. हिरोची जन्मठेप सद्वर्तनामुळे चार वर्ष माफ होते. मग तो आपल्या घरी जायच्या ऐवजी कमिशनरच्या बंगल्या जवळ कसा काय,जानने के लिये.... हिरो, ज्याचं नाव भोला,म्हणजे तसला भोला (मी बाई भोळा ग भोळा खातो पुरणाचा गोळा) नाही तर भोला भंडारी (शंकर),एका प्रसंगात एकटाच सत्तर बदमाशांची वाट लावतो.ज्युडो,कराटे,ताई का वांडू सग्गळ सग्गळ कौशल्य हिरो पणाला लावतो.आता तुम्हाला शंका येईल, खरेच सत्तर का? तर मी म्हणेन शंकानिरसन करून घ्याची असेल तर शिणेमा बघण्याची जोखीम पत्करावी.(नाहीतर मित्रावर विश्वास ठेवा) अरे हो,एक सांगायचे राहिलेच की, कोणत्या बी मारामारीच्या आदुगर हिरो खिशातून एक पुडी काढतो (चुकीचा अर्थ काढू नका,ड्रग्ज नाही) त्यातले भस्म कपाळभर चोपडतो, अगदी मळवट भरल्यागत, मग म्हणे यमाचा बाप सुद्धा त्याचे शष्प( शब्द समृधी मिपा मुळेच बरं का!) सुद्धा वाकडे करू शकत नाही.आता नाव भोला म्हणलं की भस्म,त्रिशूल,गंगा की धारा वगैरे सर्व हवेच ना! चित्रपटात सारखं हॅपनिंग आहे. प्रेक्षक खुर्चीला चिटकून रहायचा प्रयत्न करतो.पो. चौकीवर बदमाशांचा हमला.चौकीतले बचे खुचे पोलीस पळून जातात. बाकी पोलीस अस्पताल मधे भरती.आता चौकीत फक्त सौरभ शुक्ला (हा नट मला फार आवडतो. याचा कुठलाच पिच्चर मी सोडत नसतोय बघा),एक मुलगी व तीन मुले कुठल्या तरी आरोपात पकडलेली,काही कच्चे कैदी (चौकीत म्हंजे कच्चेच ना पण पक्के बी असू शकतील!)एस. पी.डायना,(हिरोईन), (सुपारीटेंडर, हायला एटो करेक्ट,लई बेक्कार क्रियेटीव्हीटी. मला म्हणायचंय सुप्रीटेण्डट ऑफ पोलीस ) सुरूवातीला डायन असेच ऐकू आले.काय करणार वय झालंय, आणी आपला हिरो.एकटा हिरोच जे काय करायचंय ते करतो बाकी सारे तळघरात. काय सांगू तुम्हाला,एक अद्भुत शस्त्र कधीच बघीतले नाही.एकटा हिरो त्या स्वयंचलित शस्त्राने हजारभर बदमाशांना सहज ठार मारतो. तुम्हाला म्हणून सांगतो त्या शस्त्रा सोबत गोळ्यांचा पट्टा (Ammunition Strip) एवढा मोठ्ठा की जशी मारूतीची शेपटी. संपतच नाही. म्हणतात ऋषीचं कुळ,नदीचं मुळ कधी शोधू नये तसाचं हा पट्ट् सुद्धा कुठवरं वळवळतो ते पण शोधू नये. हिरोला काहीही होत नाही, झाले तरी सेल्फ हिलींग सिस्टीम एवढी भारी की चाकूने फाटलेला शर्ट सुद्धा आपोआप ....... बदमाश असले की आयटम साँग होनाच मांगताय ना.चार गाणे आहेत पण पेशाने सैनीक असल्यामुळे बंदुकीच्या गोळीच्या आवाजापुढे सगळी गाणीच काय पण सरगम सुद्धा फिक्की वाटते. काय बंदुकीचे संगीत आसतयं बघा......थड् थड्,सुइंग......छ्या शब्दात बांधताच येणार नाय!सोत्ताच ऐकायला हवं. असो, हा सुदंर सीनेमा दाक्षिणात्य कैथी सिनेमाचा भाऊ( कैथी,भोला.....आता नाव भोला म्हणजे कैथीचा भाऊच ना), क्षमा करा काॅपी केला असे नाही म्हणता येणार तो हिन्दी भाषेत पुनर्गठीत (Remake) केला असे म्हणू या. चित्रपटाच्या काही विशेष गोष्टी. या सिनेमात एवढ्या गोळ्या झाडल्या आहेत की सेनेची एक रेजिमेंट इतक्या गोळ्या, वर्षीक गोळीबार सरावा (Annual Range Classification) साठी सुद्धा वापरत नसावी. दुसरी गोष्ट आवडली ती अशी की जंगल युद्धाची(Jungle Warfare) झलक. तीसरी गोष्ट म्हणजे धुवांधार गोळीबारी (Heavy shelling) होत असताना सुद्धा गाडी कशी चालवायची. गोळ्या संपल्यावर खुखरी,चाकू, डंडा याने किंवा विना शस्त्र कसे लढायचे याची मस्त कल्पनेची आयडिया येते. शेवटी हिरो मुलीला भेटतो का?हिरोईनचे काय होते?खांद्याचे ऑपरेशन होते का? ज्युनियर बच्चन केव्हा एन्ट्री मारतात? असे व इतर अनेक प्रश्न पण या सर्वांची उत्तरे सिनेमा बघितल्यावरच कळतील. मी एवढचं म्हणेन..... आम्ही बिघडलो तुम्ही बिघडा ना! कुत्ते कमीने.... गर मिल जाये वह भसम की पुडीया ... कसमसे,कारगिल,गलवान निपटलू अकेला..... भन्नाट शिणेमा.क्वामेडी,आयटम साँग, थोडा फॅमिली ड्रामा,फुल २ धमाल.जबरदस्त ब्रेन क्वेकींग, आपलं अर्थक्वेकींग सारखं.U/A 13+ बिनधास्त फॅमीली बरोबर बघू शकता. माझं पाहून/लिहून झालं. पण चित्रपटाच्या शेवटी, The End न लिहीता... To be continued......असे लिहीलयं. लगेच मला सई ताम्हणकरचं गाणं आठवलं. जरा जपून जपून चाल(बघ), पुढे धोका आहे हा.का.ना.का.