"अर्थ"

शब्दांत गुंफले मी
हळुवार जाणिवांना
स्पर्शून अर्थ दे तू
माझ्या मुक्या भावनांना..||धृ||

मज स्मरणात आज ही रे
ती संध्या भारलेली
संग लाभला तुझा अन
काय माझी मोहरली

जणू चैत्र वणवा विझावा
वळवाच्या सरींनी भिजताना
स्पर्शून अर्थ दे तू
माझ्या मुक्या भावनांना.. ||१||

हे बंध जे जगाचे
पायात घोळणारे
माझी अबोल प्रीती
जणू भिन्न दोन्ही किनारे

दिसतो तुझाच चेहरा
माझे प्रतिबिंब पाहताना
स्पर्शून अर्थ दे तू
माझ्या मुक्या भावनांना.. ||२||

मी जाणते सख्या रे
तव चिंतनी मी आहे
होकार मनी जपते
डोळ्यात लाज आहे

झणी टिपूनी घे ओठांनी
विरहाच्या आसवांना
स्पर्शून अर्थ दे तू
माझ्या मुक्या भावनांना..||३||

डोळे लागले प्रिया रे
वाटेकडे तुझ्या रे
ये झडकरी घे लवकरी
कवेत मज सख्या रे

तुज पाहण्याची लालसा
मिटनाऱ्या पापण्यांना
स्पर्शून अर्थ दे तू
माझ्या मुक्या भावनांना.. ||४||