मिपावरील जुन्या आणि नव्या अशा सर्व आदरणीय जिलेबी सम्राटांस वंदन करुन हे जिलेबीचे ताट आपल्यासमोर ठेवत आहे. या काव्याची प्रेरणा काय आहे हे जाणकार कवितेतील काही शब्दांवरुन ओळखतीलच. प्रेरणा कळली नाही तरी जिलेब्यांचा आस्वाद घेण्यात काही अडचण येणार नाही याची आम्हांस खात्री आहे. --------------------------------------------------------- अ‍ॅक्टीवावरी घालूनी मांडी, मी नव्याने कोवळा झालो अहो फेडूनीया धोतर माझे, मी पँटीत* सोवळा झालो सहा आसनीत बसली बाला, परी मज वाटेना काही जणू मुरूनी अनुभवांच्या, मी बरणीत आवळा झालो जरी पाहीना तिजकडे मी, ती निमित्त परी एक ठरली आठवणींत मम यौवनाच्या, मी रंगूनी बावळा झालो गेली नजर चु़कूनी जेव्हा, भिरभीरते नेत्र त्या षोडशेचे नजरेत अडकूनी मात्र तेव्हा, मी क्षणभर कावळा झालो आला सहा आसनीचा थांबा, गती जराशी मंद झाली बा़जूला काढत अ‍ॅक्टीव्हा, मीही शांत मावळा झालो गाडीतून उतरली कन्या, येई फडकावीत हाती चिठ्ठी म्हणे काका हा पत्ता सांगा, मी झणी मोरावळा झालो ------------------------------------------------------------ * हा शब्द "फुलपँटमध्ये" असा वाचावा. अन्यथा अर्थाचा अनर्थ होऊन आमच्या जिलब्यांना कचर्‍याचा डब्बा दाखवला जायचा.