Skip to main content

[शशक' १९] - ग्लास

लेखक समीरसूर यांनी शुक्रवार, 01/02/2019 23:31 या दिवशी प्रकाशित केले.
केशवने चार ग्लास भरले. बाहेर सुंदर चांदणं पडलं होतं. "आज जेवन झाल्यावर कोल्ड्रिंग पिऊ आपन...पोरांना आवडंल बघ. आपल्या गावात पानी नाय भेटत प्यायाला पण कोल्ड्रिंग लगेच भेटतयं! तेच पिऊन पाहू; कळंल तरी नुसतं प्यायासाठी आहे की पिकाला बी चालंल..." केशव किंचित खिन्नपणे गौरीशी बोलत होता. गौरीने केशवकडे नुसतं पाहिलं आणि मुलांना हाक मारली. "आये, शुभमनं माझं सर्टिफिकेट खराब केलं." कल्याणी रडू लागली. "कसलं सर्टिफिकेट?" केशवने विचारले. “शाळेत गनिताची एक स्पर्धा झाली होती. त्याच्यात दुसरा नंबर आला माझा, बाबा!" केशव विचारात गुंतला. "गौरी, काहीतरी गोडधोड कर. ते कोल्ड्रिंग नाय प्यायचं.” गौरीने चमकून केशवकडे पाहिलं. केशव सगळे ग्लास मोरीत रिकामे करत होता.
वाचने 49591
प्रतिक्रिया 83

प्रतिक्रिया

जव्हेरगंज शनिवार, 02/02/2019 00:00
मतदान पद्धत: सदस्यांनी प्रतिसादात +१ असं लिहिलेलं एक मत धरलं जाईल. +१०, +१११, +७८६, +१००^१०० हे सर्व १ मत धरलं जाईल.

ज्ञानोबाचे पैजार शनिवार, 02/02/2019 09:24
कथा म्हणून चांगली असली तरी मन विषण्ण करुन गेली. सकाळी सकाळी डोक्याल शॉट लागला पैजारबुवा,

प्रचेतस शनिवार, 02/02/2019 09:27
उत्तम. शेतकरी आत्महत्येचा विषय खुबीने मांडल्यासारखा वाटला.

तुषार काळभोर शनिवार, 02/02/2019 13:12
आधी हा अर्थ न कळल्याने कथा पाणचट (!) वाटली होती. पण हे वाचलं अन् अंगावर काटा आला!! शक्य असतं तर +१००^१०० दिले असते, पण फक्त नियम म्हणून +१

प्रा.डॉ.दिलीप बिरुटे शनिवार, 02/02/2019 13:50
दुसर्‍यांदा वाचली तेव्हा समजली. छान कथा. -दिलीप बिरुटे

एमी शनिवार, 02/02/2019 15:08
ओके कोल्ड्रिंक म्हणजे कीटकनाशक आणि ते संपूर्ण कुटुंब आत्म/हत्या करणार होते हे मला बर्याच उशिराने कळले... +१

जव्हेरगंज शनिवार, 02/02/2019 22:32
मतदान पद्धत: सदस्यांनी प्रतिसादात +१ असं लिहिलेलं एक मत धरलं जाईल. +१०, +१११, +७८६, +१००^१०० हे सर्व १ मत धरलं जाईल.

मराठी कथालेखक शनिवार, 02/02/2019 21:25
कोल्ड्रिंक म्हणजे विष आणि केशवचा आत्महत्येचा विचार हे मला प्रतिसाद वाचल्यानंतरच कळाले. कथा चांगली असली तरी सहज समजणारी असायला हवी होती. (इतरही काही वाचकांनी ती उशिराने समजली वा प्रतिसाद वाचून समजली हे नमूद केले आहे). त्यामुळे हा फक्त प्रतिसाद...तुर्तास मत म्हणून मोजू नये.

सुधीर कांदळकर शनिवार, 02/02/2019 21:36
दोन शब्दामधला, दोन ओळीमधला अन्वयार्थ समजून घ्यावा लागतो. शशक आवडली. धन्यवाद.

जव्हेरगंज शनिवार, 02/02/2019 22:33
मतदान पद्धत: सदस्यांनी प्रतिसादात +१ असं लिहिलेलं एक मत धरलं जाईल. +१०, +१११, +७८६, +१००^१०० हे सर्व १ मत धरलं जाईल.

चांदणे संदीप रविवार, 03/02/2019 08:02
+१ मला तरी लगेचच कळाली पण प्रतिसाद उशिरा देत आहे. लेखक महोदयांना उत्कृष्ट शशक वाचण्यास दिल्याबद्दल धन्यवाद. (लोकांना कथा कळली नाही याचा अर्थ लेखक तेच आहेत का? पळा आता...! ;)) Sandy

दादा कोंडके रविवार, 03/02/2019 17:37
दुर्दैवाने प्रतिसाद वाचून कथेचा अर्थ कळला पण तरीही +१