✍ मराठी साहित्य, संस्कृती आणि लेखनाचे व्यासपीठ

दर्पणाने सांगावे

— सांजसंध्या,
दर्पणाने सांगावे, काय बदल झाले गं रोजची मी आहे जरी, दुनिया का बदलते गं......... । धृ । रोजचाच रस्ता हा, बगीचा गं भासतो ताटवे हे फुलांचे गं, सांग कसा आखतो उंबराच्या शाखेवर, मोगरा हा डूलतो मोकळ्या या केसांशी, वारा बघ खेळतो एकटीने हरवावे, हाय असे वाटे गं रोजची मी आहे जरी.....................................| १ | उन्हामधे सावल्यांचा, खेळ जसा चालतो मनामधे आठवांचा, मेळ कसा दाटतो आरशांत पाहतांना, कोण हा खुणावतो स्वत:लाच बघतांना, जीव का खुळावतो सखयांना सांगावे, गूढ हे मनीचे गं रोजची मी आहे जरी.....................................| २ | गूलाबाच्या रंगात जाईजूई रंगते केवड्याच्या गंधात, रातराणि गंधते चांदणीच्या पावलांनी, रात्र का गं हासते पहाटल्या स्वप्नांनी, जागेपणी लाजते छेडतात सख्या मला, बदनाम झाले गं रोजची मी आहे जरी, दुनिया का बदलते गं.............| ३ | संध्या
3038 वाचन
💬 प्रतिसाद (14)

ज्ञानोबाचे पैजार
गुरुवार, 09/06/2012 - 17:01 नवीन
सतत होणारा बदल हाच शाश्वत असतो बाकी सगळे खोटे. हम्म... हे ही दिवस जातील आणि मग हातात उरतील दळणाचे डबे आणि भाजीच्या पिशव्या. आणि कडेवर केकाटणारी कार्टी.... बाकी सारे मिथ्या....

किसन शिंदे
गुरुवार, 09/06/2012 - 19:26 नवीन
. हे ही दिवस जातील आणि मग हातात उरतील दळणाचे डबे आणि भाजीच्या पिशव्या. आणि कडेवर केकाटणारी कार्टी.... बाकी सारे मिथ्या....
सहमत हो पैजार बुवा. :D
↩ प्रतिसाद: ज्ञानोबाचे पैजार

अत्रुप्त आत्मा
गुरुवार, 09/06/2012 - 17:21 नवीन
व्वा...! एक अल्लड आणी मनोहर स्वप्नरंजन ... उन्हामधे सावल्यांचा, खेळ जसा चालतो मनामधे आठवांचा, मेळ कसा दाटतो आरशांत पाहतांना, कोण हा खुणावतो स्वत:लाच बघतांना, जीव का खुळावतो मस्त जमलय. :) या स्वप्नरंजनावरून एक जुनी चारोळी अठवली... मेहेंदी भरले हात तुझे अन् काय तुला मी सांगावे..? ऐलतिराने पैलतिराला मधले अंतर मागावे.

शुचि
गुरुवार, 09/06/2012 - 18:51 नवीन
मेहेंदी भरले हात तुझे अन् काय तुला मी सांगावे..? ऐलतिराने पैलतिराला मधले अंतर मागावे.
खल्लास मारीच डाला!!!
↩ प्रतिसाद: अत्रुप्त आत्मा

मन१
Sat, 09/08/2012 - 18:13 नवीन
कविता (की गीत? जे काही आहे ते) आवडले. एक जाणवत असणारी गोष्ट म्हणजे ह्यात उत्तम गेयता आहे. संगीतात गती असणारा कुणी ह्याला खास भारतीय चालीवरचे संगीत नक्कीच देउ शकतो.