खाज!

'माज!' वाचल्यावर 'खाज' सुटली नाही तर रंग्या कसला? तेव्हा सादर आहे ..

कालचा 'गजकर्ण' थोडा आज आहे ,
आणि त्याची फार मोठी 'खाज' आहे ॥

कोणत्या वैद्याकडे मी जात नाही,
आपल्या वैदूगिरीचा माज आहे ॥
आणि त्याची फार मोठी 'खाज' आहे ॥

कालच्या 'पेल्यातले' तात्पर्य थोडे,
अन उद्याचा 'बेवडा' अंदाज आहे॥
आणि त्याची फार मोठी 'खाज' आहे ॥

घोरण्याचा ध्यासही आहे कधीचा,
अंगणातच घोंगडी अन 'बाज' आहे॥
आणि त्याची फार मोठी 'खाज' आहे ॥

तोंड मी कोठे कधी लपवू पाहातो
ना जनाची वा मनाची 'लाज' आहे ॥
आणि त्याची फार मोठी 'खाज' आहे

चतुरंग