नास्तीकांचे भारतातील योगदान

संकुचीत विचार बाजूला ठेऊन उदात्त विचार करण्याची क्षमता असेल तर नास्तिकांनाही हिंदू जिवनपद्धतीचा अवलंब करता यावा. धर्मसंस्था थेअरी मध्ये उदात्त दिसतात पण दुर्दैवाने अनेकदा व्यवहारात संकुचितवृत्तीच्या धर्ममतावलंबीकडून धर्मसंस्थांना आक्रसून टाकले जाताना दिसते अगदी तसेच विवीध समाजघटकांनी हिंदू संस्कृतीत योगदान देऊनही त्यांना अव्हेरणे, नकारात्मक आणि अथवा विषम वागणूक देणे हे हिंदूंमध्येही दिसते यात नास्तीकांचेही योगदान नाकारले जाताना दिसते. जेव्हा भारतातील हिंदू कुपमंडूकवृत्त धारणकरुन नास्तीकांचे योगदान नाकारु इच्छितात तेव्हा ते योगदान हिंदूत्वाच्या नावे वर्ग करण्याचा आग्रह धरण्या पेक्षा नास्तीकांचे भारतातील योगदान असे म्हणणे रास्त होणार नाही का ? त्यांच्या योगदानाचे मुल्य किती हे तर इतरेजन आणि काळ ठरवेल. या धाग्याचा उद्देश नास्तीक म्हणवले जाणार्‍यांच्या सकारात्मक योगदानाची नोंद घेणे आहे. भारतीय नास्तीकांनी इतर विवीध क्षेत्रात योगदान केले आहेच पण चार्वाक, सांख्य, मिमांसा, अजिवीका, जैन, बौद्ध अशा विवीध तत्वज्ञानाच्या क्षेत्रातही नास्तीकांकडून भरीव योगदान झाले आहे. विसाव्या आणि एकविसाव्या शतकात वि.दा. सावरकर, सत्येंद्रनाथ बोस, मेघनाद सहा, सुब्रमण्यम चंद्रशेखर, अमर्त्य सेन, अमोल पालेकर, श्रीराम लागू, बाबा आमटे, भगत सिंग, विजय तेंडूलकर अशी नावे दिसतात. अजूनही असतील अशा व्यक्ती आणि त्यांचे रचनात्मक कार्य यांची या धाग्याच्या माध्यमातून माहिती करुन घेऊ. या धागा लेखाचा माझ्या व्यक्तिगत विश्वास आणि श्रद्धांशी संबंध नाही. केवळ व्यक्तिगत विश्वासावरुन कुणाचेही सकारात्मक योगदान नाकारले जाऊ नये, या धागा लेखाचा उद्देश नास्तीक व्यक्तींनी भारतात केलेल्या रचनात्मक योगदानाची आदरपुर्वक नोंद घेणे आहे या कार्यात सहभागी होण्यासाठी आभार.