पॉपकॉर्न ची गरज आहे का?

पॉपकॉर्न ची गरज आहे का? पॉपकॉर्न म्हणजे 'मक्याच्या लाह्या' असे मराठी शब्दकोषात भाषांतर आहे. लाह्या म्हणजे यात वाटाणे, फुटाणे, शेंगदाणे असे सगळेच खमंग दाणे अध्याहृत आहेत. सोबतीला कोक, पेप्सी, वेफर्स असे वेस्टर्न प्रोडक्ट अॉप्शनल आहेत . पॉपकॉर्न गरज पडते(च) का? आणी का पडते? - पहिली गोष्ट म्हणजे खवैय्यांच्या तोंडाला आलेली सपक चव. कित्येक दिवसांत वशाड खायला न मिळाल्याने आलेली हतबलता. रोजचे वरणभात खाऊन चालू झालेले अपचन. यावर ऊतारा म्हणून हे लोक पॉपकॉर्नच्या 'आहारी' जातात. पॉपकॉर्न खाणारे लोक आळशी असतात असा एक समाजमान्य ग्रह रुढ झाल्याचे ऐकिवात आहे. हे लोक आपल्या गोलमटोल ढेरीवरुन हात फिरवत कोकचे घोट घेत घेत दर दोन मिनिटांनी पॉपकॉर्नचे चार पाच दाणे आपल्या तोंडात टाकत असल्याचे एक कल्पचित्र सध्या प्रकाशात आले असल्याची बातमी आहे. पॉपकॉर्न खाण्याचा योग्य कालावधी कोणता? - एखाद्या चांगल्या धाग्यावर वा रंगलेल्या चर्चेवर पद्धतशीपणे काडी सारुन 'धाग्याचा कश्मीर करणे' वा चर्चा भरकटवणे या प्रकारात पॉपकॉर्नची चव अधिक लज्जतदार होत असल्याचा दावा नुकत्याच एक जालमित्राने नाव न सांगण्याच्या अटीवर केला आहे. नवलेखकांच्या पहिल्या धाग्यांवर पॉपकॉर्नच्या खपाने नेहमीच ऊच्चांक गाठल्याचे निरिक्षण आहे. एखादा लेखक जेव्हा आपल्या धाग्यात अर्धवट माहिती, बालिश मुद्दे, अतर्क्य प्रसंग टाकून स्वतःची बौद्धिक दिवाळखोरी जाहीर करतो त्यावेळेस पॉपकॉर्नशिवाय इतर कोणताही पदार्थ खपल्याचे ऐकिवात नाही असे हॉटेल मालकांनी सांगितल्याची नोंद आहे.