बंधन बँक

परवा एक फार रंजक बातमी वाचली. एकीकडे बँकांच्या विलिनीकरणाच्या गोष्टी कानावर येत असताना एक नवीन बँक म्हणे चालू होते आहे. नाव वाचून अडखळलोच. 'बंधन बँक'. बंधन?? पुन्हा नीट वाचलं. हो, बंधन बँक असंच नाव आहे त्या बँकेचं. अनेक प्रश्न मनात उपस्थित झाले. मी अनेक तर्क करू लागलो. - बहुदा या बँकेत एकता कपूर, करण जोहर किंवा अशा हस्तींचा स्टेक असावा. कारण बंधन वगैरे असं नाव बँकेसाठी यांनाच सुचू शकतं. - इतर बँकेत केवायसी म्हणजेच नो युअर कस्टमर असतं. इथे एलवायसी - लव्ह युअर कस्टमर किंवा बीवायसी - ब्लेस युअर कस्टमर किंवा टीवायसी - ट्रस्ट युअर कस्टमर वगैरे असेल का? - बँक कर्मचा-यांना महिला असल्यास भरजरी साड्या, पुरुष असल्यास सुरवार-झब्बा असा गणवेश असेल का? - बँकेत चपला काढून, पाय धुवून जावं लागेल का? - बँकेत येणा-या प्रत्येकाचं गंध, कुंकू लावून स्वागत होईल का? - ठेवी कशा असतील?... बंधन ठेव (आजन्म), संस्कार ठेव (बालके व किशोरवयीन मुलांकरिता), विश्वास ठेव (ज्येष्ठ नागरिकांसाठी), सिंदूर ठेव (स्त्रीयांसाठी), मोहब्बत ठेव (जोडप्यांसाठी) - नवीन खाते उघडल्यावर खातेदाराचं औक्षण वगैरे केलं जाईल का? की बंधन तावीज वगैरे बांधलं जाईल? - कर्जांवर व्याज आकारलं जाईल का? की 'अपनोंसे थोडी ना ब्याज लेंगे'...' असं बँकेचं भावनिक धोरण असेल? का परतफेडीचीही अट नसेल? - इथल्या ब्रँच मॅनेजर ला ब्रँच बाबुजी किंवा ब्रँच माताजी किंवा असं काही म्हणतील का? - 'ये बँक नही, ये एक परिवार है' असं यांचं मिशन स्टेटमेंट / स्लोगन असेल का? काहीही म्हणा, हे नाव वाचल्यापासून माझं खूप कल्पनारंजन चालू आहे. बंधन बँक.... मस्त आहे. भविष्यात, संस्कृती पतपेढी, परंपरा विमा कंपनी अशा संस्था निर्माण होताना बघण्याच्या तयारीत आहे. ब्लॉग दुवा हा