[शतशब्दकथा स्पर्धा] देवकी

' हे बघ बाजारात भाजीवालीच्या दुकानात होतं ' बायको उत्साहाने बोलली. मुरलीधर श्रीकृष्णाचं चित्र असणारं पोस्टर होतं ते . दोन चार ठिकाणी फाटलेलंही होतं. भिंतीवर गणपती , लक्ष्मी , हनुमान होतेच. त्याच रांगेत हेही चिकटलं . मुंबईमधील भाड्याच्या घरात पितळी देव आणि देवघर ही मिजास कशी चालणार ? कालच युरिन टेस्ट पोझिटिव्ह आलेली ! दुसर्‍या दिवशी सर्व देवताना साधा नमस्कार केला आणि श्रीकृष्णापुढे मात्र डोके आपटून बोलली .. ' ये रे माझ्या बाळा ! ' माझ्या बापाला चारही मुलीच . बाकी तीन बहिणीनाही तीन मुलीच . मला मुलगा झाला तर तो माझ्या बापाला दत्तक देवून मी संसारातून बाहेर पडुन माहेरच्यांच्यासाठी नोकरी करणार. "मुलगा व्हावा. कृष्णासारखा व्हावा ! जन्माला तुझ्या घरात येऊन वाढायला माझ्या घरात जावा ! "