'किल्ला' आणि प्रेक्षक!

(चित्रपट पाहिला नसल्यास सूचना: काही किरकोळ स्पॉइलर आहेत, त्यामुळे नंतर तक्रार चालणार नाही :) ) काल रात्री किल्ला पाहण्याचा योग आला. चित्रपट निश्चित आवडला पण प्रेक्षकांचा प्रतिसाद बघून काही (अस्वस्थ करणारे) प्रश्न पडले. चित्रपटाचा विषय खूप तरल आहे आणि विनोदी प्रसंगांची पेरणी असली तरी ती गरजेनुसार वातावरण निर्मितीसाठी किंवा असे म्हणूयात एकसुरी/संथ होणे टाळण्यासाठी केली आहे. दुसरी महत्वाची गोष्ट म्हणजे हा चित्रपट खूप बोलत नाही. दृश्य-परिणामकारकता(शब्द चुकल्यास सुचवावे), पार्श्वसंगीत आणि शांतता यातून खूप गोष्टी सांगून जातो. हा चित्रपट एक अनुभव म्हणून आपल्याशी जोडून घ्यायचा आहे असे मला वाटले. चित्रपटगृहातील अनुभव खूप वेगळा होता. बहुसंख्य प्रेक्षक २-३ प्रकारात होते. पहिले म्हणजे ट्रेलर बघून आलेले - ज्यांना 'शाळा' टाईप लव्ह-ष्टोरी अपेक्षित होती, सोबतीला शिव्या वगैरे यांचा येथेच्छ वापर त्यामुळे फुल २ टाईमपास! दुसरे म्हणजे 'राष्ट्रीय पारितोषिक' मिळाले आहे म्हणजे भन्नाट काहीतरी असणार. त्यांच्या नेमक्या काही अपेक्षा नसल्या तरी निखळ मनोरंजन अपेक्षित होतेच. त्यामुळे या वर्गातील प्रेक्षकांचा अपेक्षाभंग थोड्या प्रमाणात झाला. शेवटी शेवटी तर काहीजण उठून गेले, एकमेकांना शिव्या घालत होते 'का आग्रह केला' म्हणून आणि बहुसंख्य लोक बाहेर पडताना - "अरे याला काही 'ष्टोरीच' नाही!", "किल्ला नाव कशाला दिलंय?", "असा कसा मध्येच सोडला?" अशा पद्धतीच्या प्रतिक्रिया देत होते. हे सर्व एकवेळ ठीक आहे, पण ट्रेलर वरून हिंट घेऊन आलेल्या पब्लिकने अश्लील शेरेबाजी, मध्येच हसणे, ओरडणे या प्रकारांनी पूर्ण विचका करून टाकला होता. म्हणजे त्या मुलाच्या वर्गातील मुली दिसल्यावर दंगा अपेक्षित आहे, किंवा शिव्या खरडल्या जात असताना वगैरे; पण त्या मुलाच्या आईच्या एकटेपणावरून सुद्धा (नवरा नसल्यामुळे) अश्लील शेरेबाजी चालू होती. चित्रपटाचा जो कळसबिंदू आहे जेव्हा काही न बोलता तो मुलगा आपल्या आईच्या जवळ जातो तेव्हा पण आरडा ओरडा चालू होता. आता या सर्व गोष्टींबद्दल कुणाला दोष द्यायचा? प्रेक्षक तर म्हणणार, आम्ही 'ट्रेलर' बघून किंवा 'मनोरंजना'साठी पैसे मोजून तिकीट काढलंय! 'झी मराठी'ने किल्ला आणि फँड्री च्या बाबतीत जाहिरात करताना 'मास-अपील' असणाऱ्या गोष्टींवर भर दिला होता(लव्ह-ष्टोरी इ.) त्यामुळे प्रेक्षक 'त्या' अपेक्षेने गेल्यास त्यांचा अपेक्षाभंग होणे अपेक्षितच आहे! पण ह्याची दुसरी बाजू म्हणजे अशी 'पब्लिसिटी' झाल्याशिवाय प्रेक्षक थेटरात जाउन पिच्चर बघत नाहीत! कोर्ट च्या वेळी पण साधारण असाच अनुभव होता. आपले अनुभव, मत याविषयी जाणून घ्यायला आवडेल. बादवे - चित्रपटाचे छायाचित्रण भन्नाट आहे! काय कोकण दाखवलाय - एका शॉटला अख्या स्क्रीनभर समुद्र किनारा आहे आणि मध्ये तो मुलगा बसलाय! अप्रतिम! किल्ला, लाईट-हाउस चे चित्रण पण जबरी. पार्श्वसंगीत आणि एक कविता खूप भारी! 'भूतनाथ रिटर्न्स' फेम खोडकर बालकलाकाराचे काम मस्त आहे(बहुसंख्य लोकांना 'तेवढेच' आवडले)!