ओढ वादळी ...(लवंगलता छंद)

नको मज हे विसावे
शुभ्र चांदण्याचे
साद देती मार्ग मला
तप्त या धुळीचे |

पाउलांना ओढ माझ्या
निळ्या आभाळाची
नजरेत सामावली
रेघ क्षितिजाची |

घोंघावती दरीतूनी
अनावर वारे
तेजाळती त्या गगनी
लक्ष लक्ष तारे |

नभास या गवसणी
गिरीशिखरांची
सौदामिनी उजळती
कडा काजळीची |

उधाणल्या या वार्‍याची
गाज मनी राही
वादळी ही ओढ अशी
उमलते देही |

गुंजन हे गोड नको
भोगी भ्रमरांचे
साद द्यावी त्याने, ज्याचे
पंख गरुडाचे |