समस्यापूर्ती

अरे ? आपणा समस्तांची (काव्य ) प्रसव क्षमतेस कांय झाले ? समस्या .... आज नाही पौर्णिमा ,अन ग्रहण नाही आजला, सांग सखये कोणता तो, चंद्र कैसा ग्रासला ? याला उत्तर ....... स्वैर वार्‍यावरति सोडुन , केस अपुले मोकळे, गंधलोलुप होउनीया , खुडत होती ती फुले . तिमिर घन कचपाशपट तो , मुक्त जो झेपावला, आणि त्याने यौवनेचा , मुखचंद्र् अवचित ग्रासला. दूर गेला घर धनी जो, नाही अजुनी परतला, आस लागुनि भेटिची तिज, जीव तो व्याकूळला. जीव घेणी ती प्रतीक्षा, साहवे ना तीजला आणि चिंतेने तियेचा, मुखचंद्र् अवचित ग्रासला. माळण्याला मधुपुष्पमाला, जाउनी ती बैसली, पाहुनी प्रतिबिंब अपुले, धुंदली आनंदली, आणि पिकला पाहता तो, केस कचपाशातला, काळजीने सुंदरीचा, मुखचंद्र् अवचित ग्रासला. चोरुनी भेटावयाला, प्रियकराला चालली भेटिच्या त्या कल्पनेने, रोमरोमी बहरली, पुढति दिसला अन अचानक, जन्मदाता तीजला, भीतिने त्या यौवनेचा, मुखचंद्र् अवचित ग्रासला. वरील समस्या व त्याची पूर्ती माझे मामा श्री. जे. मधुकर (वय ७२ वर्षे ) यांचे कवन आहे. ते स्वतः आंतर जाल वापरत नाहीत. त्यांना मी "मि.पा." ची ओळख करुन दिली असता त्यांना हे संकेत स्थळ आवडले. व त्यांनी सर्व मिपा करांच्या अभिनंदनार्थ वरील समस्या व पूर्ती मला लिहून दिली आहे. आपला (मामा भक्त भाचा) लहरी सागर.