Skip to main content

काळजावर मोगर्‍याचे वार झाले

लेखक विशाल कुलकर्णी यांनी शनिवार, 31/01/2015 19:51 या दिवशी प्रकाशित केले.

आज डोळा आसवांचे भार झाले
वेदनांचे मोकळे कोठार झाले

दुश्मनांची राहिली ना जरब काही
ओळखीचे चोर येथे फार झाले

देवभोळा साव आता मी न उरलो
दैव माझे यारहो गद्दार झाले

भ्रष्ट का अंधारही होतो अताशा..?
चंद्र तारे कां निशेचे, 'जार' झाले?

आळ घ्यावा ज्यावरी, ना शस्त्र उरले
काळजावर मोगर्‍याचे वार झाले

वाचले जे झुंजले जगती 'विशाला'
पाठ दावुन धावले ते ठार झाले !
***********************************
(वृत्त:मंजुघोषा)

काव्यरस
मराठी गझल
लेखनविषय:
वाचने 5061
प्रतिक्रिया 18

प्रतिक्रिया

दिपक.कुवेत रविवार, 01/02/2015 14:43

पण "दैव माझे यारहो गद्दार झाले" ह्या एवजी "दुर्दैव माझे यारहि गद्दार झाले" हे जास्त शोभुन दिसेल का? सॉरी कवितेतील काहिच कळत नाहि तरीही हिम्मत करतोय....

विशाल कुलकर्णी रविवार, 01/02/2015 17:08

दीपकभौ,अहो दुर्दैव 'आपले'असतेच कधी? जेव्हा दैव (नशीब)साथ देत नाही तेव्हाच त्याला दुर्दैव म्हटले जाते. पण इथे (भल्या असो वाईट असो) माझ्या नशीबाने सुद्धा माझी साथ सोडलीय, गद्दारी केलीय माझ्याशी हीच शायराची खंत आहे. धन्यवाद !

पाषाणभेद शुक्रवार, 06/02/2015 09:03

आळ घ्यावा ज्यावरी, ना शस्त्र उरले
काळजावर मोगर्‍याचे वार झाले

क्या बात है विशल्या! जबरदस्त!!