बाप्पाचा नैवैद्य - चुरमा लाडू आणि पंचखाद्याचे मोदक

नमस्कार मंडळी. गणपती बाप्प्च्या नैवेद्यासाठी चूरम्याचे लाडू आणि पंचखाद्याचे मोदक देत आहे. जरूर करून बघा!

चूरमा लाडू

सर्व मिपाकरांना गणेश चतुर्थीच्या हार्दिक शुभेच्छा !!

साहित्यः

१ वाटी कणिक
१/४ वाटी रवा
१/२ वाटी वितळलेले तूप +२ टेस्पून तूप
३/४ वाटी पिठीसाखर (आवडीप्रमाणे कमी-जास्तं)
१/२ वाटी भाजलेली खसखस
दूध कणिक भिजवण्याकरिता
काजू-पिस्ता तुकडे
१/२ टीस्पून वेलचीपूड
१/४ टीस्पून मीठ
तळायला तूप / तेल

पाकृ:

एका भांड्यात कणिक, रवा व मीठ एकत्र करावे.
त्यात २ टेस्पून तूप घालून चांगले मिक्स करुन घ्यावे.
लागेल तसे दूध घालून घट्ट कणिक भिजवून घ्यावी.
झाकून १०-१५ मिनिटे बाजूला ठेवावे.

१०-१५ मिनिटांनी कणिक चांगली मळून घ्यावी.
कणकेच्या छोट्या पुर्‍या/ मुटके/ गोळे करुन घ्यावे.
तुम्ही ह्या पुर्‍या तुपात मंद आचेवर डिप फ्राय करु शकता.
मी आप्पेपात्रात चमचाभर तूप घालून मंद आचेवर सोनेरी रंगावर तळून घेतल्या आहेत.
तळून किचन टिश्युवर काढून ठेवाव्यात.
पूर्ण गार झाल्यावर खल-बत्त्यात थोडे कुटून घ्यावे व मग मिक्सरला बारीक फिरवून घ्यावे.

चुरम्याला एका ताटात काढून घ्यावे.
त्यात काजू-पिस्ता तुकडे, वेलचीपूड घालून मिक्स करावे.
पिठीसाखर घालून छान एकत्र करावे.
त्यात थोडे पातळ केलेले तूप घालून मध्यम आकाराचे लाडू बांधावेत.
तयार लाडू खसखशीत घोळवून घ्यावे.

बाप्पाला नैवेद्य दाखवून खावे :)

आमच्या घरची गणेशपूजा आणि नैवेद्य :)

गणपती बाप्पा मोरया !!
__/\__

----------------------------------------

पंचखाद्याचे - खिरापतीचे मोदक

साहित्य पंचखाद्यः

१ वाटी सुके खोबरे
१ टेस्पून खसखस
१/२ वाटी खडीसाखर
१ टेस्पून बेदाणे (किसमिस)
१ टेस्पून खजूर बारीक तुकडे करुन
१/२ टीस्पून वेलचीपूड

पंचखाद्यात खारकेचा वापर करतात पण मला इथे खारीक मिळत नसल्यामुळे मी खजूर वापरला आहे. तुम्ही खारीक घेऊ शकता, फक्त त्याची पूड करून घ्यावी.

पाकृ:

एका पॅनमध्ये सुक्या खोबर्‍याला मंद आचेवर हलक्या तांबूस रंगावर भाजून घ्यावे.
बाजूला काढून ठेवावे व त्याच पॅनमध्ये खसखस हलकी भाजून घ्यावी.
खडीसाखरेला खल-बत्त्यात थोडे कुटून घ्यावे.
सुके खोबरे, खसखस गार झाले की एकत्र करावे, त्यात कुटलेली खडीसाखर मिसळून मिक्सरला बारीक फिरवून घ्यावे.
ह्या मिश्रणात आता बेदाणे, खजूरचे तुकडे व वेलचीपूड घालून एकत्र करावे.

साहित्य मोदक आवरणः

१ वाटी मैदा
१/२ वाटी रवा
दूध मैदा भिजवण्यापुरते
१/४ टीस्पून मीठ
व ३ टेस्पून तेलाचे मोहन

पाकृ:

एका भांड्यात रवा, मैदा व मीठ एकत्र करावे.
त्यात कडकडित मोहन घालावे.
चांगले मिक्स करावे, थोडे थोडे दुध घालून घट्ट पिठ मळून घ्यावे.
तासभर झाकून ठेवावे.
तासाभराने पिठ पुन्हा एकदा मळून घ्यावे व त्याचे छोटे-छोटे गोळे करावे.

पंचखाद्याचे - खिरापतीचे तळणीचे मोदकः

गोळ्याची छोटी पारी लाटून मुखर्‍या पाडून घ्याव्यात.
त्यात चमचाभर सारण भरून, हलक्या हाताने मोदकाचे तोंड बंद करावे.
अश्या प्रकार सर्व मोदक बनवून घ्यावे.
कढईत तेल तापत ठेवावे, आच मंद असावी.
एक-एक करुन तयार मोदक त्यात सोडावे व मंद आचेवर सोनेरी रंगावर तळावेत.
छान खुसखुशीत होतात मोदक.

पंचखाद्याचे - खिरापतीचे मोदक गणपती बाप्पांना नैवेद्य दाखवून प्रसाद म्हणून सर्वांना द्यावे :)

गणपती बाप्पा मोरया !! __/\__