Skip to main content

ऋण

लेखक यशोधरा यांनी शुक्रवार, 07/02/2014 04:46 या दिवशी प्रकाशित केले.
भांबावतो कल्लोळ. माझ्या उरात दडू पाहतो. पाहता पाहता नभही अलगद झाकोळून येतं. आपसूक दूरस्थ होणारे किनारे पाहताना, भरतीचा ठाव सुटतो... तुझा माझा मांडलेला पसारा पाहते. त्यातून स्वत:ला निर्लेपपणे बाजूला काढायचं ठरवते. हळूच एक प्रश्न डोकं वर काढतो, विचारतो, कधी चुकतं करशील तुमच्या नात्याचं देणं? परतीच्या वाटेवर थांबलेली पावलं, ऋणात गुंतून राहिलेलं हे मन...
काव्यरस
करुण
लेखनविषय:
वाचने 6021
प्रतिक्रिया 33

प्रतिक्रिया

इन्दुसुता शुक्रवार, 07/02/2014 21:07
आपसूक दूरस्थ होणारे किनारे पाहताना, भरतीचा ठाव सुटतो... कोण सुटलय यातून? तरीही ठाव सुटायचा राहत नाही. गुंतून राहिलेलं हे मन... आणि हे तरी कुणाला सुटलय? रचना आतपर्यंत पोचली... आवडली.

उपास शुक्रवार, 07/02/2014 21:22
तरल.. सुंदर मांडलेयस! >>परतीच्या वाटेवर थांबलेली पावलं, ऋणात गुंतून राहिलेलं हे मन...>> आणि 'गुंत्यात गुंतूनिया, पाय माझा मोकळा..' म्हणणारा (स्वच्छंद) तो...

तिमा शनिवार, 08/02/2014 12:29
कविता आवडली असे म्हणण्यापेक्षा भिडली असे म्हणेन. अशा कवितांतूनच माणूस स्वतःचे अनुभव चाचपून पहातो.

पद्मश्री चित्रे रविवार, 09/02/2014 17:29
छान लिहिल आहेस. >>त्यातून स्वत:ला निर्लेपपणे बाजूला काढायचं ठरवते. हे आवडलं . (खूप कठीण आहे हे जमणं.)

राघव सोमवार, 10/02/2014 14:14
हे कसे? - ऋण कोणाचे कोण स्तवे अन् प्रेम कुणाचे श्रेष्ठ ठरे? सतजन्माचे नाते अपुले, तुझ्या[च] व्रताचे बंध खरे.. या जन्मातिल साथ तुझी मज मिळती कैसी सांग बरे.. तूच मनांतिल अमृतधारा.. तव प्रेमाने विश्व तरे! राघव

यशोधरा सोमवार, 10/02/2014 16:10
मस्त :) मज मिळती कैसी? - मिळती? की मज मिळेल कैसी - असे चालेल?

राघव गुरुवार, 21/01/2016 20:32
प्रतिसाद द्यायचा राहून गेला.. नाही इथं मिळती हाच शब्द बरोबर आहे. कारण साथ आत्ता मिळालेली आहे.

इन्दुसुता सोमवार, 10/02/2014 18:48
@राघव, तुमची रचनाही आवडली. मूळ रचनेपेक्षा तुमच्या रचनेचा आशय काहीसा वेगळा वाटला. @यशो, मला येथे " मिळती'च योग्य वाटते आहे ( तुझ्या व्रतबंधाशिवाय आपल्याला सातजन्मीचे नाते / या जन्मीची साथ कशी मिळाली असती, असे बहुतेक राघव यांना म्हणायचे आहे)

यशोधरा सोमवार, 10/02/2014 19:55
ओह, आले लक्षात! :) बरोबर. धन्यवाद इन्दुसुता. > मूळ रचनेपेक्षा तुमच्या रचनेचा आशय काहीसा वेगळा>> सहमत.