Skip to main content

किनारे

लेखक क्रान्ति यांनी मंगळवार, 12/02/2013 23:07 या दिवशी प्रकाशित केले.

[कविवर्य सुरेश भट यांच्या 'मज दोन आसवांना हुलकावता न आले' या ओळीवरची तरही गझल]

मज दोन आसवांना हुलकावता न आले
हसण्यात हुंदक्यांचे कढ दाबता न आले

कितिदा मनात आले, सुखपेरणी करावी
उपटून यातनांचे तण काढता न आले

निमिषात भंग झाली गहिरी, अतूट नाती
परक्याच आपल्यांना समजावता न आले

मरणासवे कितीदा फसवे करार झाले
जगणे नकोच होते, पण टाळता न आले

अनुकूल सूचनांना वगळून चूक केली
प्रतिकूल आर्जवांना धुडकावता न आले

असण्याहुनी सुखाचे नसणेच ठीक होते
उपभोगता न आले अन् वाटता न आले

अभिजात वेदनेचे जडशीळ जून ओझे
कवटाळले उराशी, भिरकावता न आले

जुळवून काफिये मी जपल्या अलामतीही,
गझले, तुझे किनारे पण गाठता न आले !

लेखनविषय:
वाचने 5320
प्रतिक्रिया 30

प्रतिक्रिया

शुचि मंगळवार, 12/02/2013 23:21

अप्रतिम आहे एकेक कडवं.

असण्याहुनी सुखाचे नसणेच ठीक होते
उपभोगता न आले अन् वाटता न आले

हे आणि

निमिषात भंग झाली गहिरी, अतूट नाती
परक्याच आपल्यांना समजावता न आले

क्या बात है!

संजय क्षीरसागर बुधवार, 13/02/2013 00:21

जुळवून काफिये मी जपल्या अलामतीही,
गझले, तुझे किनारे पण गाठता न आले !

हे लै भारी झालंय

स्पंदना बुधवार, 13/02/2013 05:06

जुळवून काफिये मी जपल्या अलामतीही,
गझले, तुझे किनारे पण गाठता न आले !

इथे साष्टांग स्विकारा क्रांतीताई!

यशोधरा बुधवार, 13/02/2013 07:36

अनुकूल सूचनांना वगळून चूक केली
प्रतिकूल आर्जवांना धुडकावता न आले

असण्याहुनी सुखाचे नसणेच ठीक होते
उपभोगता न आले अन् वाटता न आले

वा, वा!

पैसा गुरुवार, 14/02/2013 10:13

क्रांतिकडून जसे अपेक्षित तसेच.

कोणीतरी मला हे तरही गझल काय आहे जरा उलगडून सांगा बघू. मायबोलीवर अशा खूप रचना मी नेहमी बघते.

क्रान्ति गुरुवार, 14/02/2013 11:11

समस्त वाचक आणि प्रतिसादक मिपाकरांना शतशः धन्यवाद!

ज्योति, तरही गझल म्हणजे एखाद्या गझलमधल्या कोणत्याही ओळीला आपल्या खयालात गुंफून लिहिलेली गझल. ही तरहीची ओळ किंवा मिसरा नव्या गझलमध्ये कोणत्याही स्थानावर घेता येते/येतो.

इथे अधिक माहिती मिळेल.

निशांत५ गुरुवार, 14/02/2013 11:15

असण्याहुनी सुखाचे नसणेच ठीक होते
उपभोगता न आले अन् वाटता न आले
जुळवून काफिये मी जपल्या अलामतीही,
गझले, तुझे किनारे पण गाठता न आले !

चाणक्य गुरुवार, 14/02/2013 11:30

आज आता काही दुसरं वाचायला नाही मिळालं तरी हरकत नाही. दिन बन गया. धन्यवाद.

ऋषिकेश गुरुवार, 14/02/2013 11:50

वा! बर्‍याच दिवसांनी क्रान्तीतैंची गझल वाचली!

अनुकूल सूचनांना वगळून चूक केली
प्रतिकूल आर्जवांना धुडकावता न आले

असण्याहुनी सुखाचे नसणेच ठीक होते
उपभोगता न आले अन् वाटता न आले

हे पाठोपाठचे शेर कमाल आहेत!!!

अतिशय आवडली

नानबा शुक्रवार, 15/02/2013 14:53

मला गझल फारशी क्ळत नाही. पण तरीही,

असण्याहुनी सुखाचे नसणेच ठीक होते
उपभोगता न आले अन् वाटता न आले

या ओळी चर्रर्रर्रर्र करून गेल्या...

वेल्लाभट शुक्रवार, 15/02/2013 16:19

खतरनाक !
जामच भारी !
वाह वाह वाह वाह ! क्या बात है !
एक अन एक शेर भारी.

ह भ प शुक्रवार, 15/02/2013 17:03

खचून गेलो मीही अन उध्वस्तही झालो
दुवे जीवांचे तेव्हा सांधता न आले..
उलथून गेल्या भिंती, कलथून खांब गेले
छप्पर दोन घरांचे मज बांधता न आले..

अगायाया.. मेंदूच्या वळ्या सरळ झाल्या माझ्या यवढसं लिहिताना...
पण तुम्ही मात्र कमाल केलीत...