Skip to main content

मी केलेली शाडू मातीची गणेश मुर्ती...

लेखक विमुक्त यांनी सोमवार, 17/09/2012 13:34 या दिवशी प्रकाशित केले.

मागच्या वर्षी मी पहिल्यांदा गणेश मुर्ती घडवली होती... देवाच्या कृपेने मुर्ती छान झाली होती, मग ह्या वर्षीपण मुर्ती बनवायची असं ठरवलं होतं... आज नको उद्या करु असं करता-करता शेवटी गणेश चतुर्थीला एकच आठवडा उरला असताना शाडू माती कालवायला घेतली... मागच्या वर्षी माझा मित्र, यशदीप ह्याने माती कालवून दिली होती... ह्या वर्षी मीच कालवत होतो... मी सुरुवातीलाच खूप पाणी घातलं आणि माती कालवून एकजीव करु लागलो... खूप पाण्यामुळे कालवायला सोपं गेलं, पण माती खूपच ओली झाली आणि मातीला आकार देणं अवघड होवून बसलं... मग परत त्यात थोडी-थोडी सुकी शाडू माती मिसळली आणि पाणी न टाकता पुन्हा कालवली... मुर्ती घडवण्यासाठी योग्य माती कालवायला निदान २ तास तरी लागले...

हात जाम दमले होते, मग दुपारच्या जेवणासाठी ब्रेक घेतला आणि जेवण उरकल्यावर मुर्ती घडवायला लागलो... जमेल का? मागच्या वर्षी इतकीच मुर्ती छान घडेल का? असे प्रश्न मनात न आणता मी काम सुरु केलं... आधी बैठक, मग पाय, मग पोट अश्या प्रकारे मुर्तीला आकार येऊ लागला... पोटाला नीट आकार दिल्यावरच मग चेहरा करायला घ्यावा, पण मी तसं न करता पोटाला अर्धवट आकार दिल्यावर चेहरा करायला घेतला आणि पोटावर ठेवला... मुर्ती लहान असल्यामुळे मला नंतर पोटाला हवा तसा आकार द्यायला खूपच कष्ठ करावे लागले... आता मुर्तीचे हात आणि पाय करायला घेतले... एक हात लहान, तर एक मोठा असं होत होतं... सगळे हात समान आकारचे करायला एक तास तरी लागलाच असेल... मग पावलं पायांना जोडली आणि ढोबळ मानाने मुर्तीला आकार देवून झाला, आता निवांतपणे मुर्तीच फिनीशींग करायला लागलो...

फिनीशींग करताना जाणवलं की मुर्तीची सोंड जरा पातळ झालीय, मग ती सोंड काढली आणि जरा जाड सोंड बसवली... आता मुर्ती प्रपोर्शनेट वाटत होती... मला गणपतीचे कान छान जमत असल्यामुळे मुर्तीचे कान पटकन झाले...

आता सगळ्यात अवघड काम म्हणजे डोळ्यांच काम हाती घेतलं... डोळे करताना जरा भीती वाटते, म्हणून मुर्ती नीट घडल्यावर जरा आत्मविश्वास वाढला, की मग मी डोळ्यांच काम हाती घेतलं... नुसत्या दोन भुवया करायला मला २ तास लागले... मग मातीचं जानवं पण मुर्तीवर चढवलं आणि मुर्ती वाळायला ठेवली... कधी उन्हात, तर कधी टंगस्टनचा बल्ब पेटवून मुर्ती वाळवत होतो... अधून-मधून अजून थोडं-थोडं फिनीशींग चालूच होतं... २ दिवसांनी मुर्ती पुर्णपणे वाळल्यावर पांढरा रंग दिला...

व्हाईट-वॉश नंतर साधारण १२ तासानंतर रंगकाम सुरु केलं... अंगाला स्लेट कलर द्यायचं ठरवलं होतं... खूप वेळ प्रयत्न करुन पण मनासारखा रंग बनत नव्हता, मग त्यातल्या त्यात जो योग्य वाटत होता तो रंग अंगाला दिला... पितांबर पिवळ्या रंगाने रंगवलं, पण अंगाच्या स्लेट कलरवर पिवळा पितांबर उठून दिसेना, मग पिवळा आणि लाल रंग मिसळून पितांबर भगव्या रंगाच केलं...

अलंकार सोनेरी रंगवायचे होते म्हणून "गोल्डन पोस्टर कलर" आणला... हा रंग ब्रशने पसरवला तर सोनेरी वाटतच नव्हता, म्हणून लिटरली ब्रशने तो मी मुर्तीवर चिकटवला... सगळ्यात शेवटी डोळे पुर्ण केले आणि गणपती बाप्पाची मुर्ती पुर्णे झाली...

३-४ दिवसांपुर्वी जेव्हा मी मुर्ती करायला घेतली, तेव्हा मुर्ती इतकी सुरेख घडेल असं मला सुध्दा वाटलं नव्हतं...

विमुक्त
https://www.murkhanand.blogspot.in/

लेखनविषय:
लेखनप्रकार
वाचने 24422
प्रतिक्रिया 54

प्रतिक्रिया

प्रभाकर पेठकर सोमवार, 17/09/2012 13:51

वा..! चित्रकला आणि शिल्पकला दोन्ही कलांचा नुसता दर्शनिय आस्वाद घेणे एवढेच मला जमते. त्यामुळे गणपती चे घडविलेले शिल्प आवडले एवढेच म्हणू शकतो.

माझ्या डोळ्यांना तरी मस्तकाचा भाग, बाकी शरीराच्या मानाने, थोSSSSSSSडा मोठा झाल्यासारखा वाटतो आहे. जाणकार आपले मत देतीलच.

उदय के'सागर सोमवार, 17/09/2012 14:18

सुंदरच... स्वतः बनवलेल्या गोष्टींचं महत्त्व आणि आनंद काही औरच :) जमल्यास ह्या मूर्तीचं विसर्जन करु नका :)

गणेश चतुर्थीच्या हार्दिक शुभेच्छा !!!

चौकटराजा सोमवार, 17/09/2012 16:19

सगळ्यात महत्वाचे म्हणजे दरवर्षी " पेण" येथील रेखीव मूर्ती स्थपिण्याच्या मानसिकतेतून मुक्तता झाली
हे महत्वाचे. माझ्या माहितीप्रमाणे १०० एक वर्षापूर्वी अनेक घरी मूर्ती स्वत" च बनवीत असत. विमुक्त राव
मनाची ही भरारी आपल्या भटकंती प्रमाणेच लै भारी !

ताक - उंदीर बनविण्यापूर्वीच माती संपलेली दिसतेय !

अभ्या.. सोमवार, 17/09/2012 17:35

छान झाली आहे.

>>>>ताक - उंदीर बनविण्यापूर्वीच माती संपलेली दिसतेय !
माती संपली तर राहु दे. आसनावर रंगाने तरी काढा मामा. ;-)

प्रा.डॉ.दिलीप बिरुटे सोमवार, 17/09/2012 17:40

मस्त रे. लंबर एकचा गणपती मला अंतिम रंगकाम झालेल्या गणपती इतकाच आवडला.
कलाकारी आवडली. लगे रहो.

-दिलीप बिरुटे

चौकटराजा शनिवार, 22/09/2012 12:34

फिस्कल डेफिसिट कमी करण्यासाठी आयकरात ३० च्या ऐवजी ३५ टक्के दराची एक आणखी स्लॅब वाढवावी असे सांगणारा कोणी वॉरेन बफे
भारतात नाही याचा गणपतीला मनस्वी राग आलेला आहे !

विकास सोमवार, 17/09/2012 21:05

एकदम आवडली! गोंडस आहे. :-)

रंग कुठले वापरले? केवळ शाडूच्या मातीची असल्याने (म्हणजे प्लॅस्टर ऑफ पॅरीस नसल्याने), इको फ्रेंडली आहे असे म्हणता येईल असे वाटते.

जेनी... सोमवार, 17/09/2012 21:09

दोन्ही पाय जुळवलेली बालरुप मुर्ति रंगावरुन वीट्ठलदर्शणी वाटली.
छान आहे फक्त डोक्याचा भाग शरिरापेक्षा साधारण मोठा जानवला .
राग माणु नये .मुर्त्ति सुंदर ,कलेचं कौतुक .

तर्री सोमवार, 17/09/2012 21:52

आपली कला खूप आवडली आहे.
घरी केलेल्या गणपतीला स्वत: खपून केलेली आरास व आपल्याच बागेतील फुलांची पूजा हा योग अनुभवला आहे . तेंव्हा विसर्जनाच्या दिवशी डोळ्यात पाणी आले होते.

प्रास सोमवार, 17/09/2012 22:35

मूर्ती झकास बनलेली आहे.
आणि हो, मला व्यक्तिशः गणपतीच्या मूर्तीमध्ये धडाच्या तुलनेने डोकं थोडं मोठं असणंच योग्य वाटतं. शेवटी लहानग्या बाळाच्या धडावर हत्तीचं शिर जोडलेलं आहे शंकरदेवानं, नै का?

पिवळा डांबिस सोमवार, 17/09/2012 23:16

मूर्ती मस्त बनली आहे. आवडली.
हार्दिक अभिनंदन!

अमोल केळकर गुरुवार, 20/09/2012 11:01

खुप मस्त !
यावर्षी आम्हाला शाडूची मुर्ती मिळाली नाही. पुढील बर्षीसाठी आत्ताच नोंदणी करु का तुमच्याकडे ? :)

मोरया !

अमोल केळकर

शेफ गुरुवार, 20/09/2012 14:03

मुर्ती छान जमली आहे.
मलाही एकदा प्रयत्न करायला आवडेल. पण... शाडुची माती कुठे मिळेल?

स्पंदना रविवार, 23/09/2012 16:28

येस्स! मलापण दुसर्‍या फोटोतली मुर्ती आवडली.
विमुक्त तुमच कौतुक कराव तेव्हढ थोडच.एव्हढ्या छान्छोकीच्या जमान्यात कोण स्वतः तयार करुन बघेल नाही का?