कै. दारासिंह यांना सादर संगीतमय श्रद्धांजली,

>>>> तरी म्हणलं दारासिंग जाऊन इतका वेळ झाला तरी अजून सुतकी धागा कसा नाही आला... चालायचंच.....तसंही कोणाचंही मरण आता तितकसं संवेदनशील राहीलेलं नाही, रोजच लोक अनेकानेक कारणानं मरताहेत. वार्धक्याचंही मरण तसंच. आपण अमरत्वाचं वरदानं घेऊन आलेल्यांनी कोणाकोणाच्या कलेवर अश्रू ढाळायचेत, नाही का...? >>>>फेफरातली बातमी इकडे छापून उगाच स्वतः ची धागा संख्या वाढवण्यापेक्षा तुम्ही अनोखी श्रद्धांजली अर्पण केलीत श्रद्धांजलीबरोबर काही अधिकची माहिती असलीच पाहिजे, विंग कमांडर यांनी चांगले दुवे डकवलेत. धन्स. -दिलीप बिरुटे

काही देमार चित्रपटाना ओपीनी संगीत दिले. त्यावेळी ए ग्रेड सिनेमासाठी मिळणारे पैसे त्यानी वसूल केले. या चित्रपटांत नायकापेक्षा ओपी ची कमाई अधिक झाली म्हणे ! दारा साहेबांचे कौतुक यासाठी, आदर यासाठी की १९५२पासून ते २००५ पर्यंत ते कोपर्‍यात कधी जाऊन बसले नाहीत. झोतात राहिले.

दारासिंगची खास ओळख रामानंद सागर यांच्या रामायणातल्या मारुती पासून झाली. असहमत. असे म्हणणे म्हणजे दारासिंग ह्यांच्यातील पहिलवानाचा आणि कलाकाराचाही अपमान आहे असे वाटते. दारासिंग 'रुस्तम-ए-हिन्द' पासून प्रकाशझोतात आले. पहिलवान म्हणूनही त्यांची कारकिर्द जगभरात नावाजलेली आहे. ह्या जोडणीवर बर्‍यापैकी माहिती आहे. रामायणाच्या कितीतरी आधी चित्रपट क्षेत्रात मुमताज बरोबर मुख्य भूमिकेत त्यांनी १७ चित्रपट केले आहेत. चित्रपट सृष्टीच्या कृष्ण-धवल कालखंडापासून दारासिंग यशाच्या शिखरावर होते. चित्रपटसृष्टीचा रंगीत जमाना सुरु झाला आणि ते मागे पडले. तरीही दुय्यम भूमिकांमधून त्यांनी लक्षात राहण्याजोग्या भूमिका केल्या. 'आनंद', 'चमेली की शादी' वगैरे काही नांवांवर दारासिंग ह्यांनीही मोहोर उमटवली आहे. हल्ली-हल्लीचा 'जब वी मेट', मला वाटते, त्यांचा शेवटचा चित्रपट असावा. रामायण मालिकेत आजवर लोकांच्या मनांत असलेल्या हनुमानाच्या प्रतिमेशी दारासिंग ह्यांची शरीरयष्टी, भव्यकपाळ, बोलकेडोळे आणि चेहर्‍यावरचा राकट, तरीही, सेवाभावी भाव इतका तंतोतंत जुळला की त्यांची ती भूमिका लोकांनी डोक्यावरच घेतली. दुरदर्शन मालीकेने 'त्या' मारूतीला घरोघर पोहोचविले. आधीपासूनच मोठ्यांचा, शरीर सौष्ठवाचा, आदर्श असलेल्या दारासिंगाला लहानग्यांच्या विश्वातही भयंकर प्रसिद्धी मिळाली. ह्याचे श्रेय रामायण मालिकेला नक्कीच आहे. पण इथे त्यांची 'खास' ओळख सर्वांना झाली ह्या मताशी मी सहमत नाही. असो.

चित्रातील हनुमान फारच गोड आहे हे न राहवल्यामुळे नमूद करतो :)

'दारासिंग - रंधावा यांची जंगी कुस्ती अमुक अमुक ठिकाणी अमुक तारखेला" अशी पत्रके वाचलेली आठवतात. मराठी, हिंदी विकीपिडिया वर उचकापाचक करतांना मला एक पोष्टर आवडलं. [चित्र सौजन्य] -दिलीप बिरुटे

दारासिंगांचे चित्रपट कितीही पैसा मिळवून देत असले तरी त्यांच्याबरोबर काम करायला त्याकाळच्या साधना-वैजयंतीमाला यांसारख्या प्रथितयश अभिनेत्री तयार होत नसत. काही झाले तरी दारासिंग काम करीत असलेले हे दे-मार चित्रपट ब-दर्जाचे समजले जात. पुढे सॅमसनच्या शूटिंगदरम्यान निर्मात्याने चित्रीकरण पहात असलेल्या मुमताझ आणि तिच्या १४ वर्षाच्ह्या बहिणीकडे बोट दाखवून त्यांतली एक नायिका म्हणून पसंत करायचा आग्रह केला. "मी ब्रह्मचारी, मला त्यांतले काही समजत नाही, आपण सांगाल तिच्याबरोबर काम करीन"...दारासिंगांचे उत्तर. आणि मुमताझ दारासिंगांची नायिका झाली, आणि त्यापुढील काळात मुमताझची मरगळलेली चित्रपट कारकिर्द झळाळून निघाली. मुमताझच्या बहिणीने पुढे दारासिंगांच्या धाकट्या भावाशी लग्न केले. [साभार :मराठी विकिपीडिया ] प्रा.डॉ.दिलीप बिरुटे [मराठी विकिपीडिया सदस्य]

एकदा मी एका मारामारीत मधे पडलो तर त्यातील एकाने विचारले " तू स्वता: ला काय दारासिंग समजतोस काय ?" मस्त......:)