बाळाचा चाळा- कंटाळा !!!!!

नोंदः सध्या मिपावर चालू असलेला कविता, नवकविता आणि विडंबनाच्या जिलब्यांचा पाऊस पाहून आम्ही ही बरेच दिवस आधी पाडलेली ब्लॉगवरील जिलबी सादर करीत आहोत. वृत्त- स्रग्धरा. कंटाळा पूर्ण पाळा, वळवळवळिता , रोडका होशि बाळा | देहाचा सान गाळा, शिणवुनि विरळा, का करावा कृपाळा? लागावा छान चाळा, बघत बस नळा, तोय वाहे खळाळा | किंवा येंगोनि माळा, सकलहि झुरळां, मारि रे चंडकाळा ||१|| वृत्त- शार्दूलविक्रीडित. चित्ती नाद उठे मनी पुटपुटे, आलस्य हे गोमटे | कैसा दीस उठे व रातहि कटे, दोघे जसे भामटे | तोंडीची जरि मक्षिका नच फुटे , तादात्म्य वाटे, पटे | जे कोणी दिवटे जगात फुकटे, हे त्यांपरी ओखटे ||२|| वृत्त- उपजाति. आलस्य आहे जगतात थोर | तयाविना विश्व पुरे असार | तयाविना कार्य महत्वहीन | तेणेगुणे शीण नसे “रुटीन”||३|| वृत्त- उपजाति. म्हणाल का लावियले पुराण? उपाय जो ह्यावरि रामबाण | तो ऐकता सोडुनिया उसासे | आलस्यभृत्यांत जावे अपैसे ||४|| - कंटाळा ब्लॉग चे प्रेरणे बद्दल आभार. http://kantala.blogspot.in/ आणि सरतेशेवटी - वृत्त- द्रुतविलंबित. न कळता पद अग्निवरी पडे| न करि दाह असे न कधी घडे | अलस नाम वदों भलत्या मिसें| सकल कार्यचि भस्म करीतसे||५|| – श्री .वामन नरहर शेषे, राहणार कोरेगाव कुमठे (सातारा) , यांची क्षमा मागून (!)