मनाच्या खोल गाभार्‍यात

मनाच्या खोल गाभार्‍यात
गर्भरेशमी भरजरी वातींच्या
सुवर्णदिपांची एक माळ जळतेय
.
त्या चांद्ररुपेरी प्रकाशाची धग देहाच्या
सर्व गात्रातून गरगरतेय
.
काही तुझ्यातील माझ्या स्मरणांच्या अन् काही
माझ्यातील तुझ्या स्मरणांच्या या वाती
.
.
या धगधगणार्‍या वातींवर
निळ्या सुरमयी वार्‍याचा सणसणता आघात
.
विद्ध मनाच्या दग्ध उंबरठ्यावर
एक अवघडलेला पाऊस उरलाय
.
सरता सरता ह्या पावसाने
फक्त दोन वाती जळत्या ठेवल्यात
.
.
जळता जळता जाळणा-या
जाळता जाळता जळणा-या
.
मनाच्या खोल गाभा-यात
खोल खोल खूप आत
दिपांची तमा न बाळगता
तमाशी झगडणार्‍या
ओंजळभर तेलाची लाज राखण्यास
.
मनाच्या खोल गाभा-यात
गर्भरेशमी भरजरी या वाती

|- मिसळलेला काव्यप्रेमी -|
(२९/०९/२०११)