तुझी माझी प्रित होती

हातांना ना कधी, गुंफण आता मिळायची
पावलांना सवय होवूदे, एकटेच चालायची
भेटलो तो किनारा, विसरूनी जा
तुझी माझी प्रित होती, विसरूनी जा ||१||

त्या आर्त नजरा, ते नजरेतले बोलणे
न बोलताच कळणारे मनातील हुरहुरणे
आठवणींना सांग, स्मरणातूनी निघूनी जा
तुझी माझी प्रित होती, विसरूनी जा ||२||

आठवते मला दिलेले मोरपीस निळेगार
तूही वहीत ठेवले होते पिंपळपान जाळीदार
भेट दिली घेतली, परत घेवूनी जा
तुझी माझी प्रित होती, विसरूनी जा ||३||

'तुझी माझी प्रित नव्हती', सवय होईल ऐकायची
नित्य सराव करतो वाट एकट्यानेच चालायची
ऐकण्या मनाचे सारे माझ्या, एकदा भेटूनी जा
तुझी माझी प्रित होती, विसरूनी जा ||४||

तुझी माझी प्रित होती, विसरूनी जा
जिवनात आले वादळ कधी, विसरूनी जा ||धृ||

- पाषाणभेद (दगडफोड्या)
१२/१२/२०१०