ही वसते सर्व जनात
करी जागृत 'अहं' क्षणात
राखाया मर्जी हिची
ना स्वकीयांची ही क्षिति ||१||

हे मित्र होते हो कधी
पण आली प्रतिष्ठा मधी
आज नजरेत यांच्या गरळ
एक शब्द ही न ये सरळ ||२||

उन्मत्त गर्व अन माज
हे स्तवन शब्द ही धरी
वाढवी वर्चस्व भू-वरी
तडतडा तांडव करी ||३||

चालता तुम्ही आदर्शे
ही हळूच तुम्हा चिकटते
आल्हादे मोह पाडुनी
ती अधिकृत ठाण मांडते ||४||

मग आदर्श हो दुय्यम
अन करिती जन तडजोड
कसे चिकटता तिज तुम्ही
हे सुटत नसे हो कोड ||५||

साऱ्या आयुष्याचा खेळ
मोडते एका घडी
लावीन सर्व मी पणाला
पण प्रतिष्ठा आहे बडी ||६||

वावरते राजकरणी
नेस्तनाबूत करी घराणी
किती बळी लेकी बहिणी
तरी संपे न ही कहाणी ||७||

घ्या दाखला हा पुराणी
हा राम असे की कुणी
हा प्रश्न मनाला पडे
जाती विश्वासा तडे ||८||

राखण्या प्रतिष्ठा रामराज्याची
हा क्षणात निर्णय घडे
दिली अग्निपरिक्षा जीने
गर्भिणी वनवासी पडे ||९||

धन दौलत ही तुडवीते
न्याय देऊन ही रडविते
उंच आभाळी चढविते
तोफे तोंडी ही उडविते ||१०||

आहे लक्षण स्व-भक्षण
दुज्याची करून धुळधाण
एकाच्या अंकी चढे
हिज वाचून सारे अडे ||११||

निष्ठेला लावून तिष्ठा, बघ राज्य करी प्रतिष्ठा |