मिपावर "ट्विटर"

मित्रानो , एक काळ असा होता की मिपावर पडीक असणे शक्य होते. पण आयुष्याच्या इतर पैलूंबद्दल जे झाले ते , दुर्दैवाने येथेही झाले आहे : सगळ्याचीच घाई नि कशालाही वेळ नाही. आता पूर्वीसारखे बत्तीस कोर्सेस चे इच्छाभोजन शक्य नाही. आता घुटक्याघुटक्यानेच आस्वाद शक्य आहे. (सध्यातरी). मनात विचार आला की, सद्यस्थितीला अनुरूप असे काहीतरी नेमके आणि छोटेसे काहीतरी लिहिता आले - आणि इतरांकडून ऐकता आले तर मजा येईल. आजमितीला, करोडो लोक वापरत असलेल्या "ट्विटर" नावाच्या संकेतस्थळामधे लोक नेमके हेच करतात. मग हीच संकल्पना इथे राबवून पहायला काय हरकत आहे ? म्हणून हा धागा. या धाग्यामधे एकाच विषयाला उद्देशून असे लिखाण न करता , आजच्या दिवसात , आताच्या घडीला तुम्हाला जे लिहावेसे वाटते आहे ते एखाद्-दोन वाक्यात आपण लिहू शकतो. पहा, आवडले तर हा धागा आपण चालू ठेवू. माझ्या "ट्वीट" पासून सुरवात करतो. ३० ऑगस्ट ला आमच्या शहरात "ब्लॅक अँड व्हाईट" नावाच्या , सध्या अमेरिका दौर्‍यावर असलेल्या मराठी कार्यक्रमाची घोषणा करण्यात आलेली आहे. कॅलिफोर्नियाच्या एका शहरी आयोजित केलेल्या याच कार्यक्रमाची एक झलक त्यांच्या स्थळावर आहे : http://www.calaaonline.com/