निरोप

पुन्हा सख्या नववधू होऊनी आली दिवाळी दाराशी इंद्रधनूचे रंग वेचुनी रेखिली रांगोळी मी खाशी इवल्या इवल्या पणतीतून स्पर्धा नभीच्या तार्‍यांशी गंध खमंग फराळातला.... प्रीत तोलतो हाताशी उल्हासाची पखरण भवती, आतिशबाजी आकाशी तुझी लक्ष्मी तुझ्या स्वागता उभी बावरी उंबर्‍याशी ..... ......... तुझ्याएवजी निरोप आला....... काळोखाच्या घनराशी मोरपिशी पदराने रोखते... जळता हुंदका ओठाशी विखुरलेल्या रंगावली या, कुणी मिळवले अभिरासी ? तव नामाची इवली पणती... ज्योत उडाली आकाशी अर्ध्यावरती डाव मोडता... प्रीत एकली उपवासी मिटले कुंकु.. फुटले कंकण... जुळले नाते मातीशी ..... ........ निरोप देऊ द्या सखयाला जरा जाऊन त्यांच्यापाशी शेवटचे हे अभ्यंगस्नान मज उटणे लावु द्या गालासी (ऐन दिवाळीत, नरकचतुर्दशीला, ठाण्यात घडलेल्या दुर्दैवी घटनेने व्यथित असलेल्या त्यांच्या स्वजनाना व दिवाळीच्या काळ्या आठवणी घेऊन जगणार्‍या तमाम बंधू भगिनींना समर्पित !!!)