आज पेश करतोय लोकाग्रहास्तव (विशेषतः विशाल, गणपा, स्वाती राजेश , स्वाती २ यांच्या आग्रहास्तव ) गौरीच्या नैवेद्यातील माझा सर्वात आवडणारा पदार्थ पंचामृत कच्चा मालः १. एक-दीड ईंच लांबीचे खोबर्‍याचे पातळ काप (१५-२०) २. भाजलेले शेंगादाणे (१५-२०) ३. हिरव्या मिरचीचे तुकडे (१५-२०) ४. कोथिंबीर ५. कडीपत्ता ६. भाजलेल्या तिळाचे कूट (अर्धी छोटी वाटी) ७. शेंगदाणा कूट (अर्धी छोटी वाटी) ८. मीठ ९. चिंच १०.गुळ ११. जिरे १२. मोहरी १३. तिखट स्टेप १: वाटीभर पाण्यात चिंच भिजवत ठेवणे..साधारण एक तास स्टेप २: एका छोट्या पतेल्यात जिर्‍या मोहरीची फोडणी करावी. स्टेप ३: फोडणीत कोथिंबीर, कडीपत्ता, खोबर्‍याचे पातळ काप, शेंगादाणे , हिरव्या मिरचीचे तुकडे, तिळाचे कूट, शेंगदाणा कूट घालून थोडा वेळ परतावे. स्टेप ४: वरच्या मिश्रणात चवीनुसार मीठ आणी तिखट घालावे. स्टेप ५: आता त्यात एक वाटी बनवलेला चिंचेचा कोळ टाकावा. अर्धा वाटी साधं पाणी पण टाकावं. स्टेप ६: त्यात गुळाचा एक छोटा तुकडा घालावा. आणी त्यास १०-१५ मिनिटे उकळू द्यावे. (घट्टपणा कसा हवाय त्यानुसार) तायार आहे नैवेद्याचे पंचामृत....वरील सामान घेऊन केलेलं पंचामृत तीन-चार जणांच्या नैवेद्यास पुरेल.