चारोळ्या...

मुक्ती

कुंडीमुक्त लगेच जाहले
कचरामुक्त कधी होणार?
पदपथावरी अनंत वस्तू
कुठल्या नियमाने हरणार?

फुले

काटे मजला गुलाब तिजला
कितीक वर्षे असेल चाले
आता अमुची मुलेच देती
बाईंना शाळेत फुले॥

परी

दिसलीस तू, हसलीस तू
रूसलीस तू, रडलीस तू
रागावलीस, फसलीस तू
माझी परी झालीस तू॥

पट्टी

मी पट्टीचा ठार आंधळा
बांधून तू पट्टी डोळ्यावर
पातिव्रत्याचे हे फळ का?
जन्म दिला कौरवांस शंभर॥

संभ्रम

झाडामागून बाण मारुनी
वाली वधिला, कुठे पराक्रम?
रघुकुलरित अशी का असते
न्यायनीतीला पडला संभ्रम॥

सिंधू

"एकच प्याला" मधली सिंधू
कशी भाळली सुधाकरावर
उचंबळे जवळी शशि येता
वेडा सिंधू तयाचे उत्तर॥

दिगंबर

सभेत सारे बहिरे श्रोते
वक्त्याने त्या काय करावे?
दिगंबरांच्या गावामधे
धोब्यांनी त्या कसे जगावे?

उलटापालट

उलटा करता 'सरस' शब्द हा
'सरस' राहतो पुन्हा बिलंदर
'साक्षरा'स परी उलटे करिता
'राक्षसा'स निर्मितो कलंदर॥

शिक्षा

वस्त्रे पळवी गोपींची
शिक्षा जाहली श्रीहरीस
वस्त्रहरण प्रसंगी
वस्त्र पुरवी द्रौपदीस॥

अजब

द्रौपदीचे पाच पती
खरे खोटे जाणे कुंती
धन्य जगी पतिव्रता
अजब ही न्यायनीती॥

(मो)बाईलवेडे

मोबाईल वेडे आता
रस्तोरस्ती गल्लोगल्ली
शहाण्या पोरींस कळेना
कोण व्यक्ती कोण वल्ली॥

हद्दपार

पटेल नेहरूच का
फाळणीचे गुन्हेगार
जिना झाले सेक्यूलर
जसवंत झाले हद्दपार॥

आशा

गळू लागल्या कमळपाकळ्या
धनुष्यदोरी ढिली जाहली
घड्याळात बाराच वाजले
पंजाची आशा पालवली॥

लैला?

तिने केसात माळले
लाल गुलाबाचे फूल
कमरेला लटकले
लाखमोलाचे पिस्तूल॥
नको छेडखानी करू
तीच शिटी वाजवेल
अरे महिला पोलिस
कशी लैला बनेल?

मोकळे केस

समोरच्या सज्जामधूनी
केस मोकळे सोडून कुरळे
उभी पाठमोरीच नेहमी
राहतसे का कधीच नकळे॥
परी एकदा भाग्य उजळले
कसेबसे वळुनिया बघितले
होते सरदारजी उन्हामधि
वाळवीत ते केस आपुले॥

टिकली

लांब आडवे भाळावरचे, कुंकू गेले आली टिकली
फिरताफिरता ती ही पडली, खिशामधे मी जपून ठेवली
नावावरती डकवून तिजला प्रेमपत्र पाठविले सुंदर
तुकडे तुकडे करुन टाकले, टिकली घेऊन हसली क्षणभर॥

काहूर

एकलव्याचा अंगठा
आणि शंबूकाचे शीर
अजून रक्त वाहते
उठे उरात काहूर॥

अटळ

मूर्ती फोडून अमूर्ता
नाही जमणार बघणे
स्वरांनाही जाहले अटळ
कृष्णवेणूत लपणे॥