Skip to main content

[कविता' २०२०] - तृष्णा

लेखक साहित्य संपादक यांनी सोमवार, 11/05/2020 17:31 या दिवशी प्रकाशित केले.

तृष्णा




कुंद हवेच्या संथ दुपारी मंद येतसे गंध जुईचा गुंग होउनी आम्र पाहतो झिम्मड दंगा गेंदफुलांचा. फांदीवरती उभा खिन्नसा खंत कशाची काक वाहतो पंखावरती रोजच त्याच्या इंद्रधनुष्ये मित्र काढतो. अरुंद छोट्या बांधावरती लालबुंदशा गुंजा पडती सांभाळत ते लांब पिसारे वेचायाला मयूर जमती. पुंजी अपुली जलबिंदूंची पर्णमंचकी खुली ठेवती शांत बैसली पंकजपुष्पे भृंगसख्याची वाट रोखती. ...... तडागतीरी बिंब न्याहळी यौवनातली मुग्ध राधिका कशी कळेना तंग कंचुकी नंदपुत्र तो स्वप्नी दिसता. रंध्रांध्राला स्पर्शुन जाईल मृद्-गंधाने बोझल वारा धुंद मनाला चिंब कराया येतिल आता पाउसधारा.

वाचने 26882
प्रतिक्रिया 37

प्रतिक्रिया

कौस्तुभ भोसले सोमवार, 11/05/2020 19:44
सुंदर सुरेख

गणेशा सोमवार, 11/05/2020 23:15
फांदीवरती उभा खिन्नसा खंत कशाची काक वाहतो पंखावरती रोजच त्याच्या इंद्रधनुष्ये मित्र काढतो. वाह

प्रिती-राधा (verified= न पडताळणी केलेला) मंगळवार, 12/05/2020 00:02
सुंदर

साहित्य संपादक शुक्रवार, 15/05/2020 21:34

मतदान पद्धत : सदस्यांनी प्रतिसादात +१ असे लिहिलेले एक मत धरले जाईल. +१०, +१११, +७८६, +१००^१०० हे सर्व १ मत धरले जाईल.

मीनल गद्रे. मंगळवार, 12/05/2020 08:28
कविता छान आहे. आवडली.

साहित्य संपादक शुक्रवार, 15/05/2020 21:34

मतदान पद्धत : सदस्यांनी प्रतिसादात +१ असे लिहिलेले एक मत धरले जाईल. +१०, +१११, +७८६, +१००^१०० हे सर्व १ मत धरले जाईल.

आवडाबाई मंगळवार, 12/05/2020 12:59
सुंदर गेय कविता

स्मिताके मंगळवार, 12/05/2020 19:09
+१ सुंदर.

आगाऊ म्हादया...... बुधवार, 13/05/2020 07:50
गेय आहे, वर्णने फार सुंदर केली आहेत

साहित्य संपादक शुक्रवार, 15/05/2020 21:34

मतदान पद्धत : सदस्यांनी प्रतिसादात +१ असे लिहिलेले एक मत धरले जाईल. +१०, +१११, +७८६, +१००^१०० हे सर्व १ मत धरले जाईल.

खिलजि बुधवार, 13/05/2020 17:28
आईची आन , काय शॉलिड लिखाण येक नंबरी कविता झालीय इथे , इथे या मनात खोलवर रुजलीय मलापण वाटते , असाच काहीसं अर्थपूर्ण लिहावंसं स्वतःच्याच मनाशी तासनतास बोलावसं

राघव गुरुवार, 14/05/2020 10:56
चांगलंय.

अजब गुरुवार, 14/05/2020 13:46
+1 वा!

बबु गुरुवार, 14/05/2020 16:55
'औदुम्बर' या जुन्या सुन्दर कवितेची आठवण जागी झाली.

चलत मुसाफिर शुक्रवार, 15/05/2020 17:44
+१ चाल लावल्यास खूप चांगलं गाणं होईल

चांदणे संदीप रविवार, 17/05/2020 13:08
सुरेख कविता! गुणगुणतच रहावी अशी. सं - दी - प

चांदणे संदीप रविवार, 24/05/2020 13:00
इतक्या सुंदर कवितेला गुण द्यायचा राहून गेला. :( २० प्रतिसादांचा (गुण नव्हे!) टप्पा ओलांडणारी एकमेव कविता! सं - दी - प

आवडाबाई बुधवार, 20/05/2020 19:27
आहाहा पाऊस पडल्यासारखाच वाटला !

गोंधळी बुधवार, 20/05/2020 19:37
१ नंबर.

प्राची अश्विनी शुक्रवार, 22/05/2020 11:52
+1

कुमार जावडेकर शनिवार, 23/05/2020 18:31
+१

g.priya शनिवार, 23/05/2020 20:07
सर्वात भावलेली कविता.

पाषाणभेद रविवार, 24/05/2020 11:13
तडागतीरी बिंब न्याहळी यौवनातली मुग्ध राधिका कशी कळेना तंग कंचुकी नंदपुत्र तो स्वप्नी दिसता. या कडव्याने कवितेला निराळे वळण मिळत आहे. हे कडवे नसते तरी चालले असते. कविता एकदम चित्रमय आहे! एक नंबर!

मनिष सोमवार, 25/05/2020 20:23
नाही हो, राहू दिले तेच चांगले झाले. काही-काही विषयांना आपण का अस्पर्श ठेवतो कोणास ठाऊक?

सत्यजित... सोमवार, 01/06/2020 16:11
तडागतीरी बिंब न्याहळी यौवनातली मुग्ध वाटिका कशी कळेना तंग कंचुकी कृष्ण-मेघ तो स्वप्नी दिसता. असं काहिसं कवितेच वळण कदाचित बदललं नसतं! कविता मोहक चित्रवती आहेच!अभिनंदन!

चलत मुसाफिर सोमवार, 25/05/2020 09:23
मिपा स्पर्धेत प्रथम क्रमांक मिळवल्याबद्दल अभिनंदन

बिपीन सुरेश सांगळे सोमवार, 25/05/2020 12:54
प्राची कविता खूपच आवडली . नादरम्य आहे . ( फक्त बोझल शब्द नको होता )