साहित्य ३५ ते ४० हिरव्या मिरच्या २० ते २५ लसणीच्या पाकळ्या १ चमचा जिरं एक मोठी मूठ कोथिंबीर १ मोठा चमचा तेल एक चिमूट साखर मीठ, चवीनुसार कुंडीत लावलेल्या मिरचीच्या झाडाला भरपूर मिरच्या येतात, मग त्याचा असा अधून मधून खर्डा करून ठेवतो. हा खर्डा साधारण एक ते दिड आठवडा टिकतो (खराब होत नाही, त्या आधीच संपवला जातो) कृती मिरच्या स्वच्छ धुवून, कोरड्या करून घ्याव्या. त्याचे बारीक तुकडे करावेत. एक पॅन गॅस वर ठेऊन, मिरच्या आधी ३ ते ४ मिनिटे मंद आचेवर कोरड्या भाजून घ्याव्या. मिरच्यांना थोडा चटका लागला, कि थोड्या बाजूला करून, १ चमचा तेल पॅन मध्ये घालावा. तेल थोडं तापलं, कि मिरच्या तेलात एकदा परतून घ्या. आता पॅन मध्ये लसणीच्या पाकळ्या टाकून, हे मिश्रण अजून थोडा वेळ परतून घ्यावे (साधारण २ ते ५ मिनिटे). मिरच्या आणि लसूण बाजूला सरकवून, पॅन मध्ये जिरं टाकावा. तेलात जिरं तडतडलं, कि मग ते मिरच्या आणि लसणीच्या पाकळ्यात मिसळून घ्या. चवीनुसार मीठ, एक चिमूट साखर आणि बारीक चिरलेली कोथिंबीर घालून मिश्रण थंड करायला ठेवा. हे मिश्रण आता आपल्याला खलबत्यात कुटून घायचंय. खलबत्ता नसेल, तर मग मिक्सर मधून ह्याची जाडसर भरड काढून घ्या, पण खर्ड्याची अस्सली मज्जा हि कुटूनच आहे.       अर्थातच, भाकरी बरोबर खायला घ्या, किंवा मग ह्याच मस्त खर्डा चिकन करा!