ताकुमा बॉयलर ताकुमा बॉयलर ह्या जगप्रसिद्ध जापानी कंपनीचे मालक श्री ताकुमा ह्यांनी त्यांच्या जवळची सर्व पुंजी ताकुमा बॉयलर बनविण्यात घालवली पण तो बॉयलर काही केल्या चाचण्या पार पाडू शकत नसे. व त्यामुळे तो बॉयलर विक्रीसाठी उपलब्ध करुन देता येत नव्हता. अगदी कफल्लक झाल्यानंतर त्यांनी एक शेवटचा उपाय म्हणून कोरियात राहणाऱ्या एका मित्राकडे काही कर्ज मागायचे ठरवले व पुढील चाचण्या व संशोधन करता येईल असा विचार केला. झाले, ते एका बोटीवर चढले व कोरियाला निघाले. तरीही त्यांच्या मनात धाकधूक होतीच, मित्राने कर्ज नाही दिले तर काय, ह्या विचाराने रात्रभर झोप नाही आली. सकाळी सूर्योदयाच्या वेळी त्यांनी बोटीच्या डेकवर फेरफटका मारण्याचा विचार केला व ते त्याच विचारमग्नतेत फेऱ्या मारु लागले. आता हळूहळू त्यांच्या मनात आत्मघाताचे विचार येऊ लागले व त्यांनी ठरवले की, पाण्यात ऊडी घ्यायची. कुटूंबियांची मनात माफी मागत ते डेकच्या कठड्यावर चढले आणि ऊडी मारणार तितक्यात सूर्योदय झाला व त्याची प्रसन्न कोवळी ऊने सर्वत्र पसरली. ताकुमा ह्यांच्या मनात एक स्फूर्तिदायक विचार आला. जणू काही आकाशवाणीच झाली. "तुला बॉयलरकडून काय हवे आहे ते तू ठरवले आहेस, बॉयलरला काय हवे आहे हे तू विचारले आहेस का?" हा विचारच त्यांनी पुर्वी केलेला नव्हता! त्यांनी आत्मघाताचा विचार सोडून दिला, प्रसन्न चित्ताने ते कोरीयाला गेले व संयोगाने मित्रानेही त्यांना कर्ज दिले. जापानला परतून त्यांनी बॉयलरच्या पाणीवहनात बरेच बदल केले व शेवटी त्यांच्या प्रयत्नाने जगाने एक अत्यंत कार्यक्षम असा बॉयलर पाहिला. आजही जगात ताकुमा बॉयलरचे नाव आदराने घेतले जाते.